إيـجــبــشــن حـلال وحـرام

الإنسان المصري بحكمه متدين ماشاء الله مولود علي السجادة

عشان كده تلاقي موضوع الحلال والحرام بيفرق معاه جدا

لكن بما إنه الانسان المصري بجبروته وقوته

والسبع تلاف سنة (من يوم ماتولدت وهما سبع الااف مازادوش يعني) شقاوة وتفتيح دماغ

عمل لنفسه حلاله وحرامه الخاصين بيه

حاجة كده ميد إن ايجبت خلي الناس تيجي تشوف الصناعة المصرية بخير

أو نقدر نقول إنه عمل

edit

شوية في المجال ده

الحلال بقي عنده له مجالاته اللي عمل فيها حبة تظابيط

زي النميمة

يفضل يتكلم ويجيب في سيرة ده ودي

وفي الاخر يقولك احنا مالنا احنا عندنا ولايا دع الخلق للخالق

وتقريبا الصفحة اللي فيها الأية بتاعة

اتامرون الناس بالبر وتنسون انفسكم

مقطوعة عنده من المصحف

لأن اشطر حاجة ممكن المصري يعملها

انه يفضل ينقد وينقد والحاجة دي راكباه من ساسه وراسه

يعني يتكلم عن الكوسة والرشوة اللي ماليين البلد

ولو رحتله الشغل هتلاقي ابن خالته وابنه وبنت أخوه متعينين عنده

أما النفاق فهو يعزه أوي

ورايه فيه إنه يجوز كما قال البحبحاني

فتلاقيه نازل مدح في رئيسه

ايا كان بقي رئيسه في العمل

ولا رئيسه في البلد

وهاتك ياكلام واشعار عن مزاياه والنجاح اللي تم بفضل وجهة نظره

وتخطيطات جلالة سعادة فخامة عظمته

ويمكن ده منتشر في فئة كبيرة جدا جدا من الشعب بتوصل للإعلام وفي الصحف

(راجع الصحف أخبار أهرام جمهورية)

ومن الحاجات الحلال اوي وبنعرف نطبقها أوي

حتة ازكروا محاسن موتاكم

يااااااه تقولش الحديث ده نزل عشان المصري

تلاقي الواحد من دول يموت من هنا وايه؟

معلقات عن الخير اللي كان بيعمله

وعن طيبة قلبه

وعن كفاءته ومحاربته للفساد

وناقص يكلموك عن فتحه للاندلس

في حين تلاقي لو عندك زاكرة شوية

وتفتكر كلامهم عنه قبل الموت

أو تعاملهم معاه

تلاقي انه كان زي طفلة الحشرة

وتلاقي تاني يوم موته في الجرايد صفحتين قصاد بعض

وكل واحد بقي قايلك بق من نوعية

فقدنا الاستاذ والاب

رمز يصعب تعويضه

يوم اسود علي السينما المصرية

الأهلي يواجه انبي...... إحم لا لا اسف انا يظهر عديت علي صفحة الرياضة

مش بس كده ده مثلا بعد مايموت بسنة وجاية الزكري السنوية

تلاقي ولا الضباب طب فين ياجماعة الحب الحب؟

فين الكلام اللي محسسنا انكم خلاص مش هتتنفسوا هوا بعديه؟

تلاقي كله راح

ويمكن لو جيت سألتهم عنه؟

مش بعيد حد يقولك

مين؟ مش الطويل الرفيع ده؟

ياعم ده كان سلام سلام يعني

وعندنا مثال صالح سليم

سنة وسنتين بعد مامات الدنيا كانت ضلام لإدارة الأهلي و لكل الاهلاوية

انما بعد خمس سنين مثلا

عدت الزكري السنوية بتاعته اول شهر مايو ده من غير مانحس بيها

غير في كام موقع لجماهير الاهلي

وطبعا مش المطلوب اننا نفضل نعيط علي الميت لمية سنة

بس هي فكرة الازدواجية والتضاد الواضح أوي في تعاملنا مع الميت

ومن ضمن الأحاديث اللي بينساها المصري

(الساكت عن الحق شيطان أخرس)

لو اتطلبت شهادته لصالح حد غلبان قصاد حد كبير او حاجة زي ده

تلاقيه عامل عبيط

وولا معبر ويقولك ياعم أربي عيالي

وممكن يطلع صايع ويجيبلك دليل ديني يدعم وجهة نظره

ولا تلقوا بايديكم الا التهلكة

وحاجة زي دي تفتحلنا سكة تانية من سكك حلال المصري

يؤمن بالابداع والتفكير في الدين

وعنده الثقة انه هيطلع تفسير جديد للقران غير اللي سبقوه

عشان كده بنلاقي ناس تستشهد بايات واحاديث علي مزاجهم وبالظاهر

حاجة كده زي ولا تقربوا الصلاة

مش عارف مين اللي يقولك ان المفروض ان ميراث البنت يبقي زي الولد

عشان الست بقت بتشتغل

والقصة مبقتش زي زمان

تقولش الدين ده كان مثلا موديل قديم ونزل منه نسخة جديدة فنعمله أبديت

ومن ضمن الحاجات الحلال

المصري في تعامله مع الناس

تشوف تعامله مع حد غلبان أو منكسر ايشي اشتغالات علي تريقة

وطبعا ده مبيبقاش حرام

لانه بيتاخد انه روشنة أو شطارة أو خبرة وحنكة في الحياة

بدون بقي مايعرف إنه ممكن بمواقف زي دي يربي عقد عن الشخص ده أو يحقر منه

أو يقلل ثقته بنفسه

أما بقي الحرام

فتلاقي مثلا من أكتر الحاجات اللي يستحرمها

لو مردتش السلام

أو لو مقلتش بسم الله قبل ماتاكل

ويزعل أوي لو اكلت او شربت بايدك الشمال

ولا بقي لو موبيلك رن وانت بتصلي

وموقف مثلا زي لما تكون بتتكلم في الموبيل في الاتوبيس مع واحدة

تلاقي البصات هتحرقك والغمزات واللمزات تقولش بيشوف حفرية فرعونية

ولو سمعت أغاني

ومش أي أغاني

لو أغاني شبابية وعاطفية يبقي حرام

أما لو لأم كلثوم أو حليم أو فيروز او منير أو وجيه عزيز

فيبقي لا

انت واد دماغ ومثقف

والمفتي قال يجوز

وحليم حلال ياحازم

والله الفكرة ماهي تريقة أو سخرية من اللي متمسك بدينه

بالعكس والله

انما الفكرة في الناس اللي بيمسكوا في الحاجات البسيطة جدا

ويسيبوا أهم حاجات

مش معني كده إني بقول أو بسخر من إننا نسمي قبل ماناكل وناكل بايدنا اليمين وكده

لا طبعا

لان دي حاجات في ديننا

وواجب نعملها بس اكيد طبعا منكتفيش بعملها ونسيب أهم حاجات في ديننا

الحاجات اللي فعلا ممكن تخلينا نتقدم ونقف علي رجلينا

لأن عمر ماكان الإسلام دين منغلق ولا دين متاخر

الإسلام لو طبقناه صح هنسود العالم زي ماأجدادنا سادوه بالإسلام برضه

بس أكيد ماهوش بالإسلام بتاع خطيب ابو دقن ومقصر الجلابية

ومبياديش شغله صح ومقضيها واسطة ونفاق

نموزج زي ده كتير أوي

وللاسف مصر دولة تبدو متدينة أو محافظة

ورغم ده بنتاخر يوم عن يوم

وأكيد تاخرنا ده مش بسبب مسئولين أو ناس كبار بس

لأ ده بسبب رئيسي فينا احنا

لأن احنا الموظف والدكتور والمدرس وكل وظيفة بتاثر علينا بشكل مباشر

لو كله طبق الدين مسلم أو مسيحي أو يهودي حتي في شغله صح

واحدة واحدة هنلاقي ان الناس الكبار ناس متدينة تدين سليم

وشادة البلد دي لقدام

وكفاية الأية دي عشان توصل الجزئية دي

إن الله لايغير مابقوم حتي يغيروا مابانفسهم

وأنا ليا راي أخير في حتةالحلال والحرام دي

الحاجات الحرام نوعين

حاجات بتاثر عليا وعلي الناس حواليا

وحاجات بتاثر عليا انا بس

يعني مثلا اما اكون مبصليش او مبصومش

المواطن اللي ماشي في الشارع هيتاثر؟

ولا اما اكون بصلي وبصوم بس مرتشي أو بفتح دماغي أو عندي محسوبية؟

ورغم ده المواطن المصري يحتقرك

وتصغر في نظره أكتر لو شافك معدي قدام الجامع ومدخلتش

وفي الأخر

أكيد فيه ناس كتير كويسة

لكن انا عن نفسي ده جزء كبير من اللي بشوفه

لكن في الاول وفي الاخر يفضل الدين ده حاجة بين الواحد وربنا

ومهما كان محدش يعلم ايه اللي في القلوب غير اللي خالقها

لكن اهو الواحد بيحاول يستشف شوية من اللي بيشوفه

وربنا يهدي

الأ فـــــتـــــــوس كــلايــت

سنة 1919 قعد حمدي أفندي وذكي افندي وعلي أفندي يدردشوا شوية في موضوع (أفندي برضه)،كانوا يادوب خلصوا مظاهرات وسعد سعد يحيا سعد فقالوا يروشوا شوية ويتكلموا في حياتهم بقي

وراح حمدي افندي سائلهم سؤال

ياتري ياأفندي منك له ممكن تتجوز واحدة من اللي كشفوا وشهم؟

واختلفت الردود مابينهم

فيه اللي قال وماله؟..... المهم دماغها وأدبها ومش بالغطا من عدمه

وفيه اللي قال لأ طبعا لأن دي حاجة بتدل علي صفاتها من جوة إنها تكشف وشها

بلاش مياصة ياحمدي أفندي أنا ضد ده تماما

وفي وسط كلامهم جه كام عسكري انجليزي

تعالي هنا منك ليها انتي بتاعة مظاهرات

وهوب اتشدوا علي المعتقل

وفي سنة 1956 كان حسين وعلي قاعدين بعد مافجروا الكامب الانجليزي

قعدوا يرتاحوا ويروشوا وشوية

راح حسين رازع السؤال

حمدي انت ممكن تتجوز واحدة مش محجبة؟

وبرضه كانت الإجابة ياإما هادية شوية

وعادي وفيها إيه و كده يعني

ياإما قاسية شوية

وانت بتقول إيه؟ لأطبعا مقبلش اتجوز واحدة كده

المهم إن دايما كان بيبقي موضوع شريكة الحياة مادة خصبة لحوارت الشباب

ومرت السنين

واتغيرت التركيبة السكانية

وفضل الموضوع ده محط اهتمام للشباب لكن مع اختلاف طبعا

وفي سنة 2007 أمير وعمر قاعدين في سيلانترو المعادي

بعد ماضربوا ماريجوانا في العربية وزي زمان نفس السؤال فرض نفسه

وله ياأمير هو انت ممكن تتجوز مزة كانت ماشية مع مز قبلك؟

لا ياعم دي تبقي بت تييت وزمانه أفور معاها عالاخر

انت فاكرني بعرور ولا إيه؟

لا طبعا مستحيل

وفيها إيه ياض يامعقد انت مانت نفضت لمني وجيهان وسارة واتجوزوا بعد كده فيها إيه يعني؟ مادامت بنت كويسة دوس يامعلم ولا يهمك

ولعلمك بقي المزة المستعملة تعيش معاك أحلي عيشة

ليه يامفتح هاخد معاها ضمان؟

لا يابن المفكوكة بس هتبقي عارفة تحايلك

عارفة إمته تتدلع عليك وإمته تيجي علي نفسها، تعملك أي حركة رومانسية صغيرة تحسسك إنك ملك

إزاي يانجم؟

يعني مثلا لو مراتك بتوصلك كل يوم للباب وتبوسك هيبقي زي مابترميلك الفطار وتدخل تنام؟

لا طبعا

هو كده ،عد بقي حركات من ده كتير

ممكن تخلي مزاجك في الطالع ولا أجدعها خابور بانجو عرانيس

مفاجأت عيد الميلاد وعيد الجواز مثلا

واحدة تجيبلك حاجة رقيقة وتعملها مفاجأة

وواحدة تانية تقولك هات فلوس أجيبلك هدية وفي الاخر يطلع قميص كاروهات أو شراب تقولش جايباه لابن البواب؟

طب وده من إيه ياعم الرومنسي المتمكن؟ ماهو فيه بنات كتير بيحبوا باحترام ومن غير تجاوزات ملموسة ومبيبقاش فيه الكلام الأوفر ده

نسبة بسيطة انما الغالبية زي مابقولك

يعني بيتعلموا الكلام ده إزاي؟

خبرة يامان احتكاك ماتشات نزلت الملعب قبل كده عرفت الجو والمز اللي قبلك ربنا يسهلله قام بمهمة تجهيز الناشيء فعرفت من تعاملها معاه الحاجات السوكومونس دي وافتكر انت كنت بتبقي عامل ازاي أما نادين (واحدة غير التلاتة اللي قبل كده)كانت تتصل عليك أول ماتروح تشوفك وصلت ولا لا

انت كلامك فيه حبة صح ياعمربس انت نسيت بقي يامعلم إن الخبرة دي ممكن تقلب عليك ولا قلبة مصطفي حجي في نادر السيد

إزاي يامحمود ياجوهري؟

يعني المز اللي قبلك كان أجمل منك أظرف منك رومنسي عنك تلاقي سعادتك مع أول خلاف بدأت تقول فين أيامك ياهيثم لان طبيعي هيبقي فيه اختلافات مابينكم وحتت ممكن يكون أحسن منك فيها تفتكرها في أول مشكلة ولا ياسلام بقي لو سمعت أغنية كانت بتفكرها بيه مانت عارف الواحد مننا لازم يبقي له مع حبيبته اربع البومات وكوكتيلين كزكريات لمواقفهم مع بعض ايشي أغنية تفكرهم بيوم ماقالوا بحبك وواحدة تانية يوم ماصالحته وواحدة لما كانوا في سيتي ستارز

يعني هتفتكره هتفتكره وشوف بقي لو ده كان في وقت انتوا زعلانين سوا

طب افرض انا كنت أحسن من الاخ اللي قبلي من كل حاجة ؟

نفس الوضع لأن اختلاف شكل العلاقة بيبان زمان كان بيكلمها بالساعات ويجري اربعة كيلو عشان يشوفها من بعيد ويبيع ساعته عشان يجيبلها هدية في الفالانتين وهكذا تلاقي الحركات السوكننة دي بتاكل أوي مع البنات في الوقت بقي اللي انت فيه راجل شغال وشقيان وفيه مسؤولية فمفيش وقت للعبط بتاع المراهقة ده رغم انك تكون بتحبها بشكل أنضج وبتشتغل عشان سعادتها لكن في لحظة نرفزة منك تقفل اوضتها وتبوس الخاتم البلاتين اللي جابهولها في عيد ميلادها عشان كده اوعي تلبس غير شبكتك تقولك بقي هدية من صحبتي بابا جابهولي عمي اللي في البرازيل مات وده طلع نصيبي كله هجص وبيبقي بتاع المز

يعني الحل ايه من رأيك؟

الحل يابا إنك تاخدلك واحدة بكرتونتها بت خضرا متعرفش حاجة في البطاطا وتربيها علي إيدك

هو لسه في الزمان ده بنات خضر ؟

موجودين بس قليلين لكن هما دول اللي تامن معاهم علي حياتك هتبقي أول ماعينها شافت فهتطلع فيك كل المخزون الاسترتيجي ايشي عواطف وايشي حب حرمان بعيد عنك

بس ماهي ممكن تكون بت كرتونة ياعم وتطلع مملة فوق الفظيع؟

إزاي يعني؟

يعني تتكسف منك وتاخدلها اربع شهور علي بال متبدأ تهزر معاك ده غير بقي الحركات الطفولية اللي بتعملها في كل تصرف ويااما تستحمل وتعلمها يااما تدخل علي المطبخ وسكينتك قدامك وشريانك في إيدك وتتكل علي الله

طب والحل ياطعم يانايتي (هه؟.... نايتي دانا جلبي جايد نار)؟

الحل ياحبيبي انك متلعبش بأي بنت عشان ميطلعش عليك ده بعد كده لأن اللي هتعمله زر زر في البنات هيطلع عليك زغ زغ في مراتك

وانتهي الحوار بإشارة من الجارسون إن العربية بتاعة عمرالونش شالها لكن نقول إيه ؟ حكم الماريجوانا

وتفضل كل فترة ليها تحدي معين في اختيار شريكة الحياة تحدي بيبقي متمثل في ظاهرة منتشرة في المجتمع ومين عالم مش بعيد سنة 2030 يكون شريف ومودي قاعدين نفس القعدة ويكون السؤال

ياتري ممكن تتجوز واحدة مش فيرجين ولا لأ؟

مين عالم؟

وعلي العموم الحمد لله المشكلة دي ضئيلة

لأنها تخص فئة محدودة من الشباب

وده بفضل سياستنا الحكيمة

لأن محدش عارف يتجوز أصلا

لكن هنقول إيه

كله في الأفتوس كلايت

خلص البوست ويارب يكون عجبكم بس فيه حاجة عاوز أقولها

أي كلام أوفر شوية في أي عمل فني أو كتابي

بيبقي ياإما تجاوز وخلاص يإما في خدمة المعني المقصود

وأنا عن نفسي كنت ضد أي كلام أوفر ولو في خدمة الفكرة

لحد ماشفت حاجة زي أوقات فراغ فياتري البوست ده بالنسبة لكم أوقات فراغ؟

ولا تجاوز غير مبرر؟

بصراحة مكنتش أقدرعن فئة كده بلغة غير اللي بشوفها وبسمعها وبقولها

يهمني أوي رايكم في النقطة دي مع رايكم في البوست

وأهو كله في الأفتوس كلايت

بـــــــــــــائــــــــع الــــســــــمــــــــيـــــــط

اعتدته ناظرا لأسفل نحو سلة سميط هي مصدر رزقه، كثيرا ماكنت أراقبه علي مدار ثواني هي فترة مروري من أمامه أثناء ذهابي إلي عملي ،كان يأخد من الناس النقود ويعيطيهم السميط من غير أن يرفع وجهه إلا قليلا شيء ما كان يجذبني إليه بصفاءه وروحه المصرية وفي يوم من الأيام قررت أن أكسر حاجزا بيننا فذهبت لأشتري منه

تعرفت عليه

حدثته كثيرا

ومن حينها وهي عادة شبه يومية لي أن أشتري منه
وفي ذلك اليوم لم أشتر كالعادة

مررت من أمامه

ناديت عليه لألقي السلام

كان يتناول إفطارا بسيطا عبارة عن قطعة سميط وكوب من الشاي
رفع رأسه ليرد السلام

صوته المصري يخترق أذني فيطربها

وابتسامته العذبة تعطيني قوة كنت أحتاجاها في بداية يوم عمل شاق

وقبل أن تتحول عنه عيناي تسمرت ملامحه

وتوقفت يداه الحاملة لقطعة السميط المبتلة بالشاي في طريقها ألي فمه

لاحظت أنه يرمق شيئا ما خلفي

فاستدرت لأري يدين متعانقتين لشاب وسيم وحسناء داخل سيارة فارهة

ولم تمر سوي ثانيتين حتي اختفت السيارة من الشارع لتعود عيناي إليه
كانت عيناه لا تزال متسمرتان في مكانهما

ولكن يده كانت ترتفع ببطء بقطعة السميط نحو فمه

وفجأة أفاق من غفوته

أفاق علي احتكاك أسنانه ببعضها البعض

لينظر مفزوعا نحو يده عند شفتيه

ثم نظرة لأسفل ليري قطعة السميط المبتلة عند قدميه

وهنا

نظر الي الطريق ثم خفض عينه معيدا إياها إلي السلة وعندها لم اجد سوي قدماي لتحملاني إلي عملي ولم يكن هناك سوي عقلي ليأمرني بأن أختار طريقا أخر غير هذا للذهاب إلي عملي فيما بعد
طريق قد يكون أطول ولكنه علي الأقل

غير مؤلم

حــــــــــــاجــــــة تــــهـــبــــــل

ازيكوا ياردالة عاملين إيه؟

وحشتوني وحشتوني وحشتووووووووووووني

أهلنن.....ترات ترات تارا

أول إنبارح كان 24/4

طب يعني إيه؟

أكيد مادام كان أول إمبارح 24/4 يبقي إمبارح 25/4

إنت هتبتديها إستظراف ياض إنت ولا إيه ؟إرجع مطرح ماكنت يالا ولا إقفل البلوجاية دي

معلس معلس ياكماحة استحملوني أصلي أول امبارح كان يوم جميل أوي في حياتي

أكيد طبعا مش عشان متش الأهلي وبرشلونة

إيهيء إيهيء إيهيء

لكن ماعلينا ياريت محدش يجيب سيرة المتش ده قدامي حقنا للدماء

المهم اليوم كان جميل عشان دكتور زويل كان عندنا في الكلية وحضرتله ندوتين

ويمكن طبعا طلعت من الندوة دي بمليون حاجة علموا في دماغي وفي تفكيري

وفعلا الراجل ده عالي أوي بشكل فوق الوصف

لو عاوزين تعرفوا دكتور زويل قال تابعوا مجلة جوانا في عددها الجاي يوم تلاتين

ملحوظة هذا إعلان مدفوع الأجر وللإعلان علي بلوجايتي المصونة يرجي الإتصال وأشعارنا لا تقبل المنافسة

المهم المهم إنه بعد مالندوة خلصت وفي وسط مانا ماشي بقي مستكنيس أوي من الكلام وجوايا طاقة غير عادية

افتكرت قصة كنت قريتها في فانتازيا لأحمد خالد توفيق إسمها اللغز

فانتازيا بعد زويل؟....ده عبيط ده ولا إيه؟

القصة كان فيها جانب شوية حسيت أنه ممكن يكون فيا ولو بشكل بسيط

ياريت اللي قري القصة ميضحكش عليا أنا قلت ولو بشكل بسيط

ندخل في الموضوع

في اليوم ده وبعد ماكلمت دكتور غنيم واتصورت معاه وبعد ندوة دكتور زويل خرجت وانا جوايا حب غير عادي للعلم وطاقة فظيعة نفسي أفجرها وخلاص بقي هبدأ أشتغل وازاكر وأبحث وكان هاين عليا أسيب متش برشلونة واروح أقعد علي النت وأبدأ بقي الشغل اللي بجد بجد وهاتك يابحث بقي

أوووماااااااااااال..... مش لازم أخد نوبل في الطب بقي ولا إيه؟

الله مالكوا مستغربين ليه هو أنا مقلتلكوش؟

لا والنبي مقلتلكوش؟

اسكتوا ....مش أنا قررت (بعد تردد شوية)إني أخد جايزة نوبل في الطب؟

اه والله ...أنا

أيوة انا نفس السخص اللي كان بيعيط في البوست الأخير إنه لسه مافتحش المواد

لكن متضحكوش عليا وصضقوني هييجي اليوم ده وهتقعدوا تقولوا كان صاحبنا

كان بيعلق عندنا

وطبعا انا ولا أعرفكم وعموما سنة 2020 قربت أهي والشغل هيبتدي بس من بكرة إن شاء الله عشان النهاردة رايح لدكتور السنان وهشوف متش الزمالك والاسماعيلي(بشري سارة لمرضي الإيدز حاولوا تحافظوا علي نفسكم لحد سنة 2020 وساعتها هتلاقوا العلاج عن مستكنيس....الكمية محدودة بادر بحجز نسختك)خلاص ضحكنا كتير هنقضي البوست كله ضحك ولا إيه؟

نخش في الجد بقي

وفي وسط الأحاسيس الكتشير كتشير أوي دي قفشت نفسي ورجعت شريط حياتي وقلبت في زكرياتي لكن ملقتش حبيب وفالي ....لقيت خيبة تقيلة بعيد عن السامعين والقاريين والشايفين

البيه الموكوس اللي هو انا بغزالة ساعة هتروح وساعة تيجي وهحكيلكم ليه بس ياريت توعدوني متفقدوش إحترامكم ليا ولو فقدتوه وده الغالب فياريت متشوهوش سمعتي عشان أعرف أتجوز

اتفقنا؟

لا

يبقي اتفقنا

نتكل علي الله

في يوم من ذات الأيام مسكت قلمي وبدأت أكتب إيشي قصص وإيشي مقالات

وعلي فكرة جايلنا تشكيلة شعر حلوة من بورسعيد التلات الجاي

المهم كزا حد عجبهم كتاباتي وقالوا في حقي كلام حلو وإني أكمل وكده وناس نصحتني أبعت لجرايد شبابية وكده المهم بعتت وعجب الناس مبدأيا لحد كده كويس

اللي مش كويس بقي إني بقي بدأت أخطط لمستقبلي الأدبي المضمون طبعاوخلاص بقي طموحي نجيب محفوظ وباولو كويلهووجايلك ياأهرام جايلك اللي هيمسك رئاسة تحريرك وبدأت بقي أكتب مقالات كتير وأقري وهوب الناس بتوع الجرايد كلموني ووسط مانا بتنطط عليهم بقي وهتنشروا المقال بكام؟ لقيتهم بيقولولي الاسلوب كويس والكلام كويس وعاوزين نقابلك وتجيب حاجات جديدة عشان نقرب وجهات نظرنا.....الله؟ يعني مقالي مش هينزل صفحة أولي؟

لاأاااااااااااااا

وساعتها كإني شفت أختي بتاخد قلم من الدرج بتاعي(دي يروح فيها رقاب)احبطت بقي وخلاص وأنا أشوف مشروع تاني غير المشروع ده وياإما أبدأ رئيس تحرير ياإما يفتح الله

ومرت الأيام وفي يوم كده كنت مكتئب وقاعد مع واحد من صحابي بنشوف فيلم أوقات فراغ فبعد الفيلم خرجت في موجة اكتئاب غير عادية

وهنعمل إيه بقي ؟ ماهي الدنيا كده ومحدش مهتم بينا ولا سامعنا

وعشت فيها الدور بقي

وكان هاين عليا أروح أشرب عشيش

حد مين اللي مش سامعك مانت يابني أمورك شغالة والصورة مش وحشة أوي

الله؟......يعني أنسي مشروع الانحراف المبرر ده؟

اه طبعا

طبعا؟....دانا خلاص بدأت أجمع نمر بنات منحرفات واديت مسد لسنية رنة

لا خلاص انسي المشروع ده

أوكي ننفض للحوار ده

ومن حوالي أسبوعين كده حضرت ندوة تنمية بشرية لفريق زدني وطول عمري من قبل ماتولد مغرم بالتنيمة البشرية المهم إني أعجبت أوي بالمحاضر خصوصا إنه كان خريج طب زميل يعني

الله؟ طب متشوف حوار التنيمة البشرية ده ده بيجيب تاثير حلو مع الناس

وعلم متقدم جدا غايب عن كتير مننا في مصر

خلاص يبقي أشتغل في التنيمة البشرية مع فريق زدني

ههههههههههههه

ماعلينا

وتمر الأيام وييجي اليوم الموعود اللي هو بتاع أول إمبارح وأبدأ بقي أفكر في العلم والطب والبحث العلمي

الله طب انا زعلان ليه ولاممكم حواليا ليه؟ ماهو كويس إني أعيش الحالة دي

علي الأقل مش عشاني ....عشان مرضي الإيدز والسرطان حتي

الفكرة ياإخواننا إني حقيقي بفكر في الحالة دي

هو أنا هوائي مثلا؟ ولا دي حاجة فينا كلنا في زمن اختفت فيه القدوة لينا؟

يمكن أنا ميال للحل التاني لأني بلاقي الحالة دي بتحصللي أما بشوف حد بيبهرني

يمكن أنا مش عاوز أحكيلكوا عن التقيلة لحد دلوقت

يوم حوار أبو تريكة مع مني الشاذلي كان مشروع ليا إني ألعب كورة في الأهلي وأبقي لعيب كبير لكني وقفت عن المشروع ده عشان مش فاضي ومش بعيد يجيلي عرض إحتراف وأسيب صحابي وأهلي والمجتمع والناس ....يبقي بلاشه المشروع ده

حقيقي والله مش لاقي تفسير للحالة دي ومش قادر أفهم برضه ليه بتختفي؟

هيا مبتبقاش حاجة غير عقلانية أو حاجة مستحيلة بالنسبة لي

يعني مثلا بالنسبة لموضوع الكتابة أنا مش وحش بس طبعا مش هبقي نجم أو حاجة كبيرة من دلوقت

وبرضه بالنسبة لموضوع العلم والطب فده شغلي والمفروض ادوس في المجال ده والمفروض طبعا إن نتيجة تراجعي عن موضوع نوبل في الطب والتعيين في الجامعة ميبقاش إني أعدي بمادتين

وهو ده مربط الفرس

ياتري سبب عدم التركيز في مشروع معين وهدف معين هو عدم الثقة في الإمكانيات؟

ولا إني بختار هدف بعيد أوي؟

ولا إني مش قادرأحدد هدف فبشبط في أي حاجة بتيجي قدامي؟

ولا دي حاجة عادية وبتحصلكم ؟

مش هعرف أطول عن كده عشان هقفل البلوجاية وأفتح جوجل

عايز أدور وأجمع معلومات عن معبد فيلة ومعبد الكرنك ماهو مينفعش إني أبقي جاهل بتاريخ أثار مصر والفراعنة هو مش المفروض إني أنطلق للمستقبل من تاريخنا القديم ولا إيه؟

وبإزن الله أتخرج وأقضي تكليفي وهألاقي توت عنخ أمون الحقيقي لأني عندي إحساس إن اللي في المتحف المصري تايواني

ولا إيه؟

أهو بـدل مـــأقــــــــفـــــــــل الـبــلوجاية

عارفين إحساس كده أما تصحي من النوم الصبح بالليل كده وتلاقي كل حاجة بايظة؟

ده بقي اللي حصللي أو مازال حاصللي الكام يوم اللي فاتوا دول

يعني صحيت لقيت فجأة إني بياضة وأنضف من تيشرت ابيض طالع من غسالة فول اوتوماتيك

الله ؟ طب ومزاكرة المكتبة؟ ههههههههه إنت هتشتغل نفسك

امممممممممم طب والامتحان إمته؟

يعني كمان شهرين ده غير امتحان الروند وعملي الشرعي

الله هو إحنا شغالين روند إيه دلوقت؟

بيقولك طب مجتمع وباين بقالهم خماستاشر يوم وراحوا تلات زيارات عليهم درجات في كتاب العملي

الله؟ هو كتاب العملي أجيبه منين؟

من القسم طبعا.... والله مكنت أعرف مكان قسم طب المجتمع ده لحد من أربع ايام ورغم عادتي إني مبحبش أسأل حد في الشارع أو أي حد عن مكان أو حاجة كده إلا إني قررت في الاخر أني اسأل

هو فين قسم طب المجتمع لو سمحتي؟

المشهد....بصة إحتقار من فوق لتحت تخرج من سيدة في الاربعينات متبوعة بجملة جافة هو ده القسم اللي انت موجود فيه...فانا فرحت بقي ورحت عشان أسأل علي كتاب العملي وفي وسط الانشكاح ده لقيت واحد بيسأل نفس السيدة وبيقوللها هو دكتور عادل مجاش يادكتورة؟

ههههههههههههههه دكتورة؟ زغرطي ياانشراح اللي راح راح

إحم ....خدت بعضي والله من غير حتي مسأل عن الكتاب أو أجيبه ورحت قعدت في المكتبة وهناك لقيت واحد جايبلي الجدول فنقلته وقفلت الكتاب وبدأت بقي في جلسة جلد للذات لمدة حوالي نص ساعة

انا ليه مبحضرش ؟ وكنت فين طول السنة؟ وفين حتي بقية الورق اللي هزاكر منه؟ده لسه مزكرة الرمد بتاعة الترم التاني مجبتهاش

طب أنا يعني لو شايف فيه شرح أو شغل في القسم كنت رحت ده الدكاترة بيحطوا الصفح علي البروجكتور وهاتك ياقراية وأنا الحمد لله عندي الكتاب وأعرف أقري يبقي مش طالبة خانقة

لكن ماعلينا مش وقت حسابات دلوقت المؤكد إني في ورطة

أربع مواد متفتحوش وسنة المفروض إني عاوز اجيب فيها تقدير ودماغ ماهش عايزة تفهم إن المزاكرة هي أهم حاجة في الفترة دي لكن علي رأي الشاعر الكبير اللي اصحابي عارفينه .......هه

دي نقطة المزاكرة فقلت ياواد عاتي عاتي وهنسترجل ونشد الشهرين دول والعملية هتبقي فل في النعل وقشطة خالث

لكن

اه من الكلمة دي تطلع كده زي القلم علي القفا وانت سرحان

هوب لاقيت إني مطلوب مني التزامات مادية مصاريف وهدايا لامي واعز صحابي واختي عشان عيد ميلادهم وعيد الأم فقلت ياواد طنث خالث والفلوس دي أخر حاجة تقف قدامها وعلي راي صديك ليا متخليش الفلوس عقبة قدامك

وشوية ولقيت عشرين ألف حاجة قدامي عاملينلي زي الصداع

يعني مثلا خناقة معتادة في البيت وواحد صديك ليا ألاقيه مستغير معايا ومش معايا زي الأول وحوار تعديل الفوسفور وأدخل مسابقة بالقصة الحزينة الأخيرة اللي كتبتها ألاقيني في السلانكاتيه وألاقي كزا التزام ورايا وكام حاجة مطلوبة مني وافكر في الناس اللي معتش بدخل علي مدوناتهم أعلق وحتي الناس اللي علقوا عندي ومردتش عليهم ....و......و.......و........وفجأة

ااااااااااااااااااااه

أنا معتش قادر ....أنا عاوز اهدي شوية مع نفسي لو عاوز أكمل

رحت عامل تليفوني خارج نطاق الخدمة وقافل البلوجاية وفاصل النت من عندي في البيت وقاعد في أوضتي لوحدي طول مانا في البيت

لكن لقيت كزا حد كلمني وافتح البلوجاية وكده.....ففكرت طب وبعدين هو حبة الهبل ده اللي هيظبطوا الدنيا؟

لا بس أنا محتاج أقعد شوية مع نفسي عشان أشوف كل الحاجات اللي علي دماغي دي

جايز فيها حاجات كتير كنت ممكن اعديها لو انا في مودي بس انتوا عارفين بقي أما تكون كزا حاجة مهمة عندك واقعة فبتلاقيك مثلا لو الكوتشي بتاعك اتقطع تقول يااااااه إيه النحس ده حتي في الكوتشي الدنيا ملطشة معايا؟

دي بقت عيشة تقرف وهوب تحس إن كل حاجة واقعة وده للاسف اللي أنا حاسس بيه

أنا كتبت البوست ده عشان بس اي حد مش برد عليه سواء هنا أو في مدونته ياريت ميزعلش مني والنقطة دي مهمة أوي عندي لانكم كنتوا في يوم مصدر لفرحة جوايا بالمجتمع بتاعكم فمش عاوز أخسر المجتمع كمان فياريت تعزروني شوية وتدعولي الفترة اللي جاية دي وكتبت كمان الموضوع ده جايز حد يلاقي فيه رسالة أنا عاوز أوصلهاله

يمكن ده الموضوع الوحيد اللي مش هطلب منكوا تعليقات عليه اللي عاوزه منكم بس شوية دعوات كده في ظهر الغيب جايز ربنا يخف عني شوية وأفوق لأني حقيقي مش مركز والله وحاسس إني تايه بشكل مشفتوش فيا من زمان أوي

ولا حاضر ولا ماضي

تروس بتلف عالفاضي

ولا فينا شباب زعلان

ولا فينا الشباب راضي

مفيش غير اننا

بندور

بــاســـووردك إيــــــــه؟؟

dr_mestekanyas

**********

وده بقي موضوعنا النهارده

**********

الباسووردات

لو بصينا في نفسنا كده وفي حياتنا هتلاقيها بقت مليانة باسووردات

يعني باسوورد الايميل

وباسوورد حسابك علي البلوجر

ولو جت تعليمات من الحكومة إن اخواتك الصغيرين ميقعدوش علي الكمبيوتر(إيه الرخامة دي؟)عشان مزاكرتهم يبقي هتلاقي باس وورد للكمبيوتر

ولو انت دبلومازي أو دكتور مثلا أو رجل أعمال يبقي هتحتاج واحدة للشنطة الزنزونايت

أو ممكن نقول الباس وورد بتاعتك علي مكنة الماستر كارد ربنا يوعدنا يارب

ومن هنا بقي نقف شوية ونهدي السرعة ونسأل سؤال رخم شوية

ياتري باسووردك ايه؟

سألت السؤال ده لناس كتير وأخدت إجابات كتير

يعني مثلا واحد قاللي رقم موبايل واحد صاحبي

وواحد قال رقم البيت بتاع مروة..متبقاش غبي مؤكد مروة دي مش بنت خالتة ولا بنت عمه

يعني لقيت شريحة كبيرة باسوورداتها رايحة ناحية ارقام التليفونات

وواحد قاللي باسووردي هيا إسم الايميل بس بحروف كابيتال... لأصايع يالا

وواحد قاللي باس ووردي 8755789854 ايه العبيط ده هوأنا

بقولك عندك كام سنة؟

وناس قالولي باس ووردي معرفش انا مختارها علي اساس إيه

وأنا يمكن من الناس دول يعني باس ووردي هيا رقم التليفون القديم لواحدة زميلتي كنت بكلمها من أربع سنين وحولت لجامعة تانية ومعتش بكلمها من سنتين ونص

ههههههههههههه حد فاهم حاجة؟

يعني باختصار فيه نسبة كبيرة من الشعب بيحطوا اللي ييجي علي بالهم ساعة اختيار الباس وورد

وهنا بقي أعدل النضارة الكعب كوباية وانزلها علي مناخيري وأبص من تحتيها

خبير ياولاد؟

وأبدا اسأل بقي السؤال اللي هاخد عليه جايزة نوبل في الطب

ياتري وانت بتختار باس ووردك بتختار حاجة بتحبها وغالية عليك لدرجة إنك عاوز تكررها كتير أثناء انشطة حياتك المختلفة؟ .... مروة مثلا؟

ولا بتحب تختار حاجة غامضة شوية تكون مجهولة بالنسبة للناس حواليك زي مثلا تليفون البيت بتاع مروة؟

لو دورت هتلاقيها باس وورد لا غامضة ولاحاجة وهتلاقي تليفونها مع نص الشعب

إحم إحم

ماعلينا إحنا جايين نهدي النفوس.... مروة دي أخت عزيزة علينا كلنا

ولا الموضوع ميمثلش بالنسبة لك أي حاجة وبتختار اللي ييجي علي بالك وخلاص وأنا بفت في الفتة وبتكلم في حوار مالوش لزمة

وهاين عليك تقوللي امشي ياض من هنا واقفل مدونتك عليك؟

ومن إجابات سعادتك أو سعادتك بكسر التاء_ عشان ميقولوش بنضطهدهم وحكوك النسوان والكلام ده_ أقدر اديك وجهة نظر طلعت بيها من الحياة دي

يعني لو بتحب تختار حاجة غامضة ومختفية فانت واخد الباس وورد نوع من اجراءات الأمن ومخون اللي حواليك أو حاسس إن ممكن حد تعرفه يحاول يخمنها ويخترق اميلك فبتحاول تجيب حاجة تبقي أبعد مايكون عن تفكيرة لانه أول ماهيجرب هيجرب رقم موبيلك مثلا ....تاريخ ميلادك ....تليفون بيتك وهكذا

ولو بتختار حاجة حاجة انت بتحبها أو مالوفة ليك فانت واخد باس ووردك نوع من الخصوصية مش أكتر وإجراء عادي فبتميل لحاجة عزيزة علي قلبك زي مثلا اللي بيسمي ابنه علي اسم حد بيحبه(حبيبتة الاولانية مثلا)عشان يكررة كتير علي لسانه فانت ممكن تبقي من النوعية دي مع الفارق طبعا

ومش هتكلم عن اللي هيجاوبوا عن السؤال التالت بنعم لانهم غلطوا فيا وميستاهلوش

يانهار أسود دول جايين ورايا أما ألحق أدخل مدونتي واقفل بباسووردي عليا لاحسن يحصلوني العمر مش بعزقة

سلام ياجماعة

**********

يــــــــــــــــــاتري مين مــــــعـــــــــانــــــــــا؟؟؟

يبدو ياإخواني انكم علي موعد مكرر مع الرسايل المفاجئة اللي مش ببقي مجهزها
بعد الرسالة اللي فاتت قعدت أجهز في القصة وأفاضل بينها وبين مقال كده وقبل ماخلاص ابعت القصة
حصل موقف بسيط صحي جوايا فكرة قديمة كانت نامت جوايا لما مقدرتش انفذها
بصوا ياجماعة
من حوالي يومين دخلت علي مدونة أختنا عذاب الروح وكانت كاتبة موضوع حلو أوي عن نصرة الرسول وكده يعني
هيا كانت كاتبة شكل من أشكال مساندتنا لرسولنا عليه الصلاة والسلام وده رجعني لورا شوية
رجعني ليوم مذبحة قانا
في اليوم ده أنا عيطت ونهنهت وانا بشوف جثث الأطفال ويومها قعدت اسأل نفسي إحنا ليه بيحصل فينا كده
فكانت إجابة سؤالي ساعة أما قلبت علي القناة الأولي ساعة نشرة الساعة ستة
لقيت إخواننا الرؤساء أطال الله بقائهم واخدين رد فعل جامد اوي
وشجب وإدانة ونرفض ونستنكر والمجتمع الدولي وكلام من الكبير الإكس لارج ده
ساعتها التليفزيون بتاعنا كاد أن يلقي حتفه من جراء خبطة مني علي دماغ سعادته
وفضلتلي بتاع يومين كده مكتئب وقاعد أفكر في مشاهد كتير بالشكل ده
معرفش دي حاجة فيا بس ولا فيكوا كلكوا
انا فعلا بكتئب بجد من أخبار زي دي
بتضرب معايا بوز جامد والله
قصر الكلام ياشباب في وسط الاكتئاب ده ربنا ألهمني بفكرة أقدر بيها أأثر ولو تأثير بسيط
الفكرة ببساطة إني أعمل منتدي انجليزي نرد من خلاله علي الغرب في اللي بيقولوه عن رسولنا وعننا
وقعدت أرسملها تخاطيط كتير
نعمل قسم للرد علي اللي بتنشره جرايدهم ووسائل إعلامهم
وجبت مواقع لجرايد كتير زي واشنطن بوست والحياة اللندنية وهاارتس ومعاريف ووكالات الانباء
ونعمل قسم نعرف فيه بالإسلام ونكلمهم عنه
وجبت نسخة قران مترجم فرنساوي وانجليزي
وقعدت أفكر اننا ندعي عشانه في غرف الدردشة الاجنبية ونعلن في مواقع أجنبية
قلت ساعتها لو كنا تلاتين مثلا وكل واحد دعي عشرة هيدخل تلتمية
لو اقتنع منهم واحد يبقي احنا كسبانين
وقعدت اتخيل تصميم المنتدي واشوف مين في اصحابي لغته كويسة
وحتي ليا صديقة امريكية من أصل مصري كلمتها وعجبتها الفكرة وعرضت تساهم
بس قالتلي المهمة صعبة ومش هتصلح تفكيرهم في يوم وليلة
فقلتلها لو كانت دي أول خطوة وتفكيرهم هيتغير عننا سنة 3000 فأنا كسبان
ساعتها كانت كل حاجة بتقوللي الفكرة دي جامدة
ماهو مينفعش نفضل نعيط ونشتم أمريكا واسرائيل ورؤسائنا













واللهم يتم أطفالهم وربنا علي الظالم والكلام ده
وإحنا قاعدين في بيوتنا
امريكا واسرائيل مش غلطانين هما عاوزين مصلحتهم وبيشتغلوا عشان هدفهم وعاوزين يحققوه بكل الطرق
الغلط فينا احنا إننا مستنيين غيرنا يعطف علينا بحقنا






هما ليهم قضية عايشين عشانها وبيسعولها بكل الوسائل المشروعة والغير مشروعة
أنا فاكر أيام حرب لبنان كانت السي إن إن بتجيب اللبنانيين وهما بيجهزوا السلاح وتجيب بعدها صور الدمار في إسرائيل
يعني إحنا اللي قتلة وهما متدمرين ومظلومين
حتي يوم قانا مجابوش ولا صورة طفل واحد


















وده عشان ياخدوا تعاطف وتأييد من الغرب ومن اللي يشوف البرامج بتاعتهم
المهم عشان متوهكوش رغم كل ده أنا كسلت

كزا حد من إصحابي كسلني
ولقيت الموضوع محتاج فلوس مكنتش متوفرة معايا ساعتها
وطبعا وكعادة المصريين أهما حيوية وعزم وهمة
ورغم حلاوة الفكرة
فسسسسسسسسسسسس
راح الحماس زي ماجه ونامت الفكرة
لكن الحمد لله انها نامت مش ماتت
لحد مادخلت علي موضوع عذاب الروح ورجعتلي الفكرة وعرضتها عندها في تعليق وعجبت كزا حد عندها
فقلت ياواد اركن القصة اللي مش عاوزة تتنشر دي علي جنب وانشر الفكرة
رد الفعل علي الموضوع عند عذاب الروح إداني أمل إني الاقي منكم اللي يساعد إن الفكرة تخرج للنور
ممكن أي حد فيكوا يساهم فيها بجد ويساعدنا اننا نحاول نعمل حاجة أفعل شوية من المظاهرات والشجب وجمع التوقيعات والحاجات دي
لو حد منكم لغته كويسة يبقي يكتب أو يترجم
ولو حد يقدر يساهم بتصميم المنتدي
وحد يساهم معانا في فلوس السيرفر والدومين عشان نعمله صح ويبقي له حماية فميقعش
وحد يجيبلنا مواقع الصحف وووكالات الأنباء وحاجات دينية مترجمة أو يجيب حاجات وإحنا نترجمها
وحد يبقي يعلن عن المنتدي في الشات والمواقع الأجنبية
وحاجات كتير أوي محتاجين حد معانا كتير عشان الموضوع ده يخرج للنور بالصورة المحترمة اللي تخليه يأثر
وكمان فيه فكرة انه يبقي عربي وانجليزي ودي ممكن تفتحلنا مجال للكتابة بالنسبة للي لغتهم مش أد كده
حاولوا تساهموا وتساعدوا ولو حتي بدعاء ربنا معاكم ربنا يوفقكم
مين عالم جايز ربنا يتقبل من حد فيكم
أنا دلوقتي جوايا نار وطاقة ناحية الموضوع ده ونفسي ألاقي ناس منكم يساعدونا ويبقي صوتهم معانا عشان صوتنا يعلي
لاننا قوتنا في لمتنا واتحادنا
مش معقول نفضل كده نهيج مع كل أزمة وبعد كام يوم نهدي وتيجي ازمة تانية وهكذا
المشاهد الغربي مش ذنبه أنه بيتعاطف مع اليهود أو بيقول علينا إرهابيين
هو معذور لأن ده اللي بيوصله
وأحنا عاوزين نوصل إحنا مين ورسولنا مين وديننا إيه
مش عشان هما أحسن مننا وعاوزين رضاهم عننا لا طبعا
هما أمة إحنا أمة...والمفروض كمان هما يحاولوا يصلحوا صورتنا عنهم
لكن إحنا من واجبات ديننا أننا ندعي له وننشره
مين عالم مش جايز حد يدخل الإسلام بسببنا
يالا أنا تقريبا خلصت ومستني رد فعلكم
اللي يحب يتناقش معايا في تفاصيل يكلمني علي الميل بتاعي
واللي من القاهرة انا مسافر قريب وممكن نتقابل ونخطط علي أرض الواقع عشان نطلع الموضوع
واللي من المنصورة أو من حتة جنبها يكلمني ونتقابل
جايز أكون بكلامي بكبر الموضوع ومحسسكم كإننا هنفتح عكا
بس والله عشان هو عندي كبير وشايف تأثيره ممكن يبقي كبير لو اتعمل بشكل محترم
مستنيكوا نقوي بعض ونحقق فكرة كويسة قبل ماتحصل أفكار كتير حلوة فكرنا فيها وكان مصيرها



فسسسسسسسسسسسسسس

عــــــــــزيــــزي الـــــحــــــلم........عـــــــــــــــــــد نـــــــــــــــــــا

من حوالي 6 شهور كنت عايش ميت بقضي وقتي في كلام ومشي وبلاي ستايشن وحبة مزاكرة وكل سنة وانتم طيبين
وفجأة

انضميت لشوية ولاد وبنات وبدأت معاهم حلم جميل

دخلت معاهم في موضوع كان هوا كل حياتنا

لكن البداية عندي كانت يوم حداشر سبتمبر يومها كنا عاملين حفلة بخصوص موضوعنا للناس

وفي اليوم ده بس عرفت شعور لعيب دكة الاحتياطي اللي بينط أما زميله يجيب الجون

مكنش دوري في الحفلة دي كبير لكن دور الحفلة فيا كان كبير

من يومها اتعلمت يعني إيه عيلة وفريق ومن ساعة مانتهت الحفلة وأنا اتخذت قرار غير معلن

إن المجموعة دي تبقي عيلتي..... عيلتي الحقيقية

لكن وكعادة أي حلم جميل بيحلمه شباب في البلد دي

الحلم اتهد وفي يوم الفالانتين المصري أربعة نوفمبر كانت نهاية حلمنا كلنا

انكسرنا ساعتها وفي الفترة اللي بعد كده مكنش حيلتنا أكتر من الدموع والذكريات

مكنش لساننا بينطق أكتر من كلمة فاكرين؟

حاولنا نخرج من حالتنا بإننا نبدأ أحلام تانية لكن خلاص قفلت وشطبنا وعلي رأي واحد مننا قال قصيدة سماها

أريد حلما لا يضيع

لكن وبعد حوالي تلات شهور من حياة متقلبة

شوية نعيط وشوية نقلب علي التيب بتاعنا القديم وأهلا بيكي ياهيافة

وساعات تطلب معانا علام ومزاكرة

وساعات نحاول نخطف أي حلم سريع يعني يعوضنا شوية عن اللي ضاع وساعات

...وساعات...وساعات

طبعا انا مش بحكيلكوا سيرتي الذاتية لأني عارف إن اهتمامكم بسيرتي الذاتية ميزيدش عن اهتمام محمود الخطيب بمتابعة برنامج عالم المراة أثناء توقيت متش الأهلي والزمالك لكن تقدروا تقولوا دي مقدمة منطقية واستهلال لابد منه للهبل اللي جاي بعد كده
فاسمعوني

ولو طلعت أهبل وقفولي تاكسي للعباسية بس حاسبوه

وإن طلعت بفهم اعملولي تمثال ولا حطوا صورتي علي الجنيه مش فارقة
اتفقنا ياردالة؟

أوكي علي خيرة الله نكمل كلامنا بقي
في وسط عدم التوازن اللي كنا عايشينه كان أكتر حاجة مفرحاني إننا لسه مع بعض مفترقناش

كنت بفرح أوي اما نروح كلنا خطوبة واحدة أخت لنا من اللي كانوا معانا

ولا أما نسمع مثلا إن حد نجح أو حصله حاجة كويسة

المهم إن في وسط الليلة دي دخل اتنين صحابنا في موضوع المدونات

وكعادتنا كنا مع بعض اتسحبنا كلنا واحد ورا التاني ودخلنا العالم ده

وبدأ المنديل يطلع عشان يمسح دمعة محبوسة في القلب
تصدقوني لو قلتلكم أنا مش عارف انا بكتب البوست ده ليه؟

كل مافي الموضوع إني عشت حالة غريبة أوي اليومين تلاتة اللي فاتوا
في وسط مانا بلف علي مدوناتكم

لقيت نفسي فجأة اتخنقت أما لقيت عاشق الروح وثورة مخنوقين
وفي أثناء ما ودني شغالة مع موسيقي الإرهابي والمواطن مصري

وإيديا شغالة علي الكمبيوتر

كانت الغدد الدمعية شغالة علي ودنه في عيني وأنا بقري البوست بتاع سمراء النيل ساعت أما الدكتورة رمتلها الورق
وساعة كمان وشفايفي رسمت ابتسامة وأنا بقري بوست وينكي

اللي كانت ملياه تهاني ومباركات وأخبار حلوة عن الناس اصحابها
ومحستش بنفسي وأنا برد علي كل واحد منهم
ومحستش بنفسي وأنا بدخل علي مدونة كل واحد وواحدة وأعيش حياته
محستش غير وأدان الفجر بيدن عشان افهم إنه عدي تسع ساعات علي قعدتي علي الكمبيوتر
وبدأت أحس إني أعرف كل واحد فيكم
معرفش ليه ساعتها افتكرت حلمنا القديم
ومعرفش ليه ساعتها بصيت علي لستة اللي متضافين عندي
جايز كنت بطمن إن إخواتي لسه معايا وإنهم عايشين معايا الحالة دي
حتي كلامنا كله بقي عن البوستات

وشفت أخف دم حط إيه؟

وقريت محض روح؟

وعاوزك ياعاشق تحطلي شات بوكس
ويمر اليوم واكتشف ان الحوار كله كان عنكم
والله مانا عارف أنا بكتب الكلام ده ليه؟
جايز عشان نفسي أقولكم كنتوا فين من زمان
وجايز موجة هبل معدية علي عقلي
لكن اللي مش جايز إني حاسس إن عيلتي بتكبر
وحاسس إني بتولد من جديد بعد ماجنازتي خلاص طلعت

ومن جوايا وبعد فاصل أربع شهور

اتكتب علي جدار قلبي

عــــــــــــــــــــــــدنـــــــــــــــا

عدنا للأحلام بعد ماخلاص كنا افتكرنا إنه معتش ينفع نحلم بعد كده

أحلامنا بدنيا تبقي بتاعتنا

دنيا إحنا راضيين بيها حتي ولو كانت علي النت

بعيلة كبيرة اسمها نفوس نضيفة

نفوس صافية لسه عندها أمل في بكرة

شباب لاقي كل شماعات الفشل ورغم كده عمره ماحبش يستعملها

محدش فينا راح لجواز عرفي ولا مخدرات ولا ...ولا...
هتلاقي فينا الشاعر والكاتب اللي نفسه في فرصة
هتلاقي فينا الفنان اللي مدفون عشان ممعاهوش كارت توصية
وهتلاقي الصوت اللي اتخرس عشان ميغنيش ويقول العنب
وهتلاقي ...وهتلاقي
صدقوني والله أنا معرفش انا بكتب البوست ده ليه

هيا بس حالة أنا عايشها بشدة فحبيت أكلمكوا عنها

جايز ألاقي اللي يقوللي وأنا كمان والله حاسس زيك

قصر الكلام يااخواتي عشان مطولش

عاوزين نبدأ من جديد هنا

أوعوا حد فينا يتكسر من أي صدمة

خليكوا جامدين عشان هييجي اليوم اللي مجتمعنا ده هينزل الشارع

وتلاقي اللي معاك في الشغل ولا اللي بيدرسلك واحد مننا

ساعتها المعاملة هتختلف والصورة هتكون غير الصورة

وده حلمي اللي حاطط كل أمالي فيه

إننا نبدأ بنفسنا

إننا بكره نبقي إحنا المجتمع ده

نبقي الدكتور والمهندس والصحفي والمدرس والأب والأم

والله ساعتها بس البلد دي ممكن تقف علي رجلها

أوعوا تستقلوا بنفسنا

إحنا كبار والله

كبار بعقلنا اللي محدش مقدره بره

كبار بدماغنا اللي لسه متدمرتش رغم كل الفساد اللي حوالينا في كل حتة

وصلتكوا رسالتي يااخواتي؟

يارب يكون وصلكوا اللي أنا حاسس بيه

لأن البوست ده والله كإني كاتبه بروحي مش بإيدي

أنا كنت مجهز قصة قصيرة ومقال جاد لكن لقتني بحط البوست ده

معلش إني طولت عليكم

بس مستني ردودكم في الموضوع ده أكتر من أي موضوع تاني

لأن ردودكم هيا اللي هتبينلي سواء اللي أنا بقوله ده جواكم

أو إني أكون زودت جرعة السهوكة والشحتفة شوية

خلص البوست واعذروني لاهيبقي فيه ألوان ولا شغل ولا حتي أسلوب أدبي

لأني عارف إني لو قعدت أظبط هتضرب في دماغي وابعت القصة واكنسل البوست ده

استلموا بقي ياحلوين يارب يعجبكم

قـــــــــــلمــــــين ولا ألــــــــمــين؟؟؟

حاملا أمالي وأحلامي اختفيت داخل حقيبة يدها محمولا إلي هذا البيت حيث أبدأ خطوة طالما انتظرتها كبداية لمستقبل أتمناه مثلما حلمت
وهناك تعرفته رأيت فيه كل أحلامي وطموحاتي ،رأيته مثلا أعلي لي فلم تفارقه عيناي
اتذكر ضحكته عندما كانت تمتد يداها لتأخده من بيننا فينزلق في فرح بين أصابعها متراقصا علي الورق مسطرا كلمات الحب منها لزوجها وأحلامها معه في إعلاء هذا البيت
وقتها كنت اتذكر ماتعلمت وتمنيت لحياتي أن تكون قائمة علي تسطير أسمي المعاني وهل هناك ماهو أسمي من حب زوجة لزوجها وهل يوجد مايرتقي علي اخلاصهما في إعلاء هذا البيت ؟،وهل توجد رقصة لنا أروع من تلك التي تسطر (زوجي الحبيب)؟
ووسط تلك الحياة وفي يوم من الأيام
يدق الجرس
تجري علي الباب
ننتظر وجهه الذي طالما افتقدناه
وتفتح الباب
ولكن
الوجه غير الوجه
والاسم غير الاسم
والصدمة غير أي صدمة
يمر الوقت ونحن في ذهول،أنظر إليه فأري علي وجهه أكبر علامات القهر...يتحاشي النظر إلي كمن يعتذر لي عن صدمتي في أحلامي

وفجأة

جاءت وأحضرت الورقة ،وامتدت يداها كالعادة حاملة إياها بين أصابعها لتكتب خطابها المعتاد لزوجها......ولكنه رفض
رفض الكتابة

رفض أن يكون جزءا من هذا الخداع والنفاق

حاولت معه مرات ومرات......فلم يكتب

لجأت إلي تعذيبه

فتارة ترجه بعنف ممسكة بأسفله.....وتارة تحركه بقوة بين كفتي يديها.....واخري تضغط برأسه علي الورق
ولكن

صدر القرار....ولا رجعة فيه......لن يكتب

وهنا يأست منه.....فألقته علي المكتب غير مهتمة بماهو فيه من إعياء
نظرت تجاهه....وجدته يعاني من ألامه.....بدأ ينزف الحبر نقطة نقطة،وأنا مذهول أود مساعدته بأي طريقة

صرخت في بقية الأقلام: دافعوا عنه افعلوا ولو شيئا واحدا.....فكان الرد باتجاه أحدهم إلي يديها ليكتب ماأرادت

صحت في جدران البيت:عمن كان يدافع؟.....تعذب من أجل تنهاروا.....أراد لكم البقاء

واتجهت إليها ذاتها: أفيقي .....لم يرفض إلا حفاظا علي بيتك

ولكن

يبدوا أن صوتي كان أضعف من أن يسمعه أحد فلم أجد غير نظرة يأس أعطيها إياه وددت أن أعتذر له عن ضعفي

وبابتسامة كانت الأخيرة....وبكلمة لم ينطق غيرها ولا بعدها ....تحدث إلي

تعلم

قالها وذهب محمولا في منديل أبيض إلي سلة في جانب الصالة حيث قدر له أن يبقي.....تاركا إياي أعاني حربا شعواء في عقلي

ماذا أراد أن أتعلم؟

هل أتعلم الحفاظ علي مبادئي حتي الموت؟

أم أتعلم ان تلك هي الحياة وإذا أردت أن أعيش فعلي بهواء اخر استنشقه غير هواء تلك المباديء؟

لا أدري

إمــــــــــــــــــضـــــــــــــــــــــــاء

قلم

نفسي اعـــــــــــــــــيش فـــــــي مــــــــــــــــصـــــــــــــــــر

نفسي أعيش في مصر
أنا بجد بحس كتير أوي ان جزء من مشكلتنا اننا معدناش مصريين
مقصدش الوطنية وتراب البلد (اللي ملهوف)والكلام الحمصي ده
اللي اقصده هويتنا
حياتنا بالشكل بتاعها
الشكل اللي بيميزنا وبيدينا روح البلد دي
عارفين؟
زمان وانا صغير كان فيه يوم كنت بستناه من السنة للسنة
كان بيبقي يوم خميس في رمضان عيلتنا كلها بتتجمع فيه
كنت يومها تلاقي ولا 50 فرد في بيت العيلة ومتقسمين بشكل روعة
فتلاقي مثلا الناس الكبار قاعدين في الصالون
والشباب الكبير واخدين جنب في الصالة وهاتك ياكلام عن الأغاني والكورة
وتلاقي خالي الصغير
واخدنا( الأطفال والشباب الصغير) وقاعد يلعب معانا بطريقتنا وهاتك ياهزار وضحك وقفشات وأغاني (وشفت الفار السندق اللي أكل البندق فوق سطح الفرن)
كان ساعتها بيدور في دماغي وأنا ببص لتقسيمة البيت كده ياتري بقي هييجي اليوم اللي اترقي فيه للشباب الكبير ثم أخد مثلا مكان خالي الصغير؟
وأتخيل كده اني لامم العيال الصغيره وقاعد ألاعبهم
أو مثلا أسرح بخيالي لاخر السلم أما أبقي من الناس الكبار وأقعد في الصالون أتكلم في السياسة والشغل والفلوس
مكنتش بستعجل انتقالي لأي مرحلة من دول لأني كنت مستمتع بالمرحلة اللي أنا فيها
لكن تقدروا تقولوا كده اني بطمن نفسي اني هفضل عايش في الجو الجميل ده سواء كعيل أو شاب أو راجل
وفجأه كده ألاقيني بقول في عقل بالي ده وقت تفكير بالذمة؟
واندمج معاهم في اللعب
ومن لحظة للتانية ابص للساعةزي ماكون خايف تيجي 12 ونروح
حتي أما كنت بروح كنت بفضل أكرر في الحركات اللي خالو بيعملها وأنا مع أصحابي
كنت بابقي من جوايا فرحان أوي وانا بعملهم حركة الصابع اللي يبان انه اتقطع وأشوفهم مزهولين
فين صابعك يامحمد؟
قطعته؟
وأقوم أنا ساعتها طالع بضحكتي
ياأهبل انت وهو أهو وأبان طبعا قدامهم الواد اللي دايس الدنيا عنهم وضاحك عليهم
لدرجة ان واحد منهم مرة قاللي ممكن أبقي اجي معاك رمضان الجاي؟
مكنتش بفرح بمنظرتي عليهم
اللي كان بيفرحني في تكرار الأفشات والألعاب دي هو اني زي ماكون بصبر نفسي بتسجيل لفيديو اليوم لحد ماتعدي السنة وأعيشه علي الهوا تاني
لكن
مرت الأيام وكبرت واليوم فضل ثابت لكن اللي مافضلش ثابت هو الجو بتاعه
بقيت ألاقي مثلا خال ليا أو خالة تعتذر عن المجي
أو نروح ونمشي بدري
....او....أو.....أو.....أو
أوات كتير جدا خلت اليوم كوكتيل أكل علي كلام متذوق
علي ناس قاعده سوا من غير تقسيم زي زمان
ومن غير روح زمان
وهيا دي فكرتي
روح زمان
روح مصر
طبعا مقصدش مصر بتاعة شريف صبري ولو بتحبوا البلد دي خلوا عيونكم عليها وكلام اعلانات الحزب الوطني
اللي أقصده روح مصر اللي عشناها زمان
الروح اللي تصحيك يوم الجمعة تجيب العيش والطعمية والأهرام الأسبوعي وتروح تصحي البيت وتفطروا وبعدها تتفرج علي فيلم الساعة عشرة بتاع اسماعيل ياسين وعبد الفتاح القصري
وتخلصه وجري علي الحمام تستحمي وتدخل جوه جلبيتك البيضا وعلي الجامع
مش الروح اللي تصحيك علي الأدان وتروح ساعة قد قامت الصلاة
الروح اللي تلاقيها في يوم العيد أما تجيب صنية الترمس والحلبة والكنافة....و...و..و وتقعد قدام التلفزيون مع مامتك وتستني الناس تيجي وتروحلهم
وبالليل تاخد أخواتك وشباب العيلة وتطلعوا علي حديقة الطفل
مش الروح اللي تصحيك يومها الساعة 3 وتصحي تخرج مع أصحابك
وأرواح كتير أوي غابت عننا لحد مابقينا بلاستيك .
مابقاش فيه فرق بين ليلة الدراسة مثلا أو ليلة الامتحان ووأي ليلة تانية
راحت مكافأة أبوك اللي بيوعدك بيها أما تنجح(العجلة اللي كلنا اتوعدنا بيها)ووحياة قلبي وأفراحه اللي يجروا يشغلوها يوم نتيجتك
بقي يومها ممكن تلاقي اللي شغال أغنية لعمرو دياب أو سعد الصغير أو براين ادامز
هو مش احنا متقدمين ومتحضرين برضه ولا ايه؟
انتهي من قاموسنا يعني ايه اخت صاحبك أو جارتك اللي تحاسبلها في المواصلات
ولو شفتها في أي مكان تقضيلها طلبها
لأن معدش فيه أمان
لو عملت كده دلوقت صاحبك هيهيج فيك
وأخته هتفتكرك بتحبها
والناس مش هتبطل كلام لو شافوك معاها ولو ثانية
بقينا مسخ
عارفين؟
حتي في علاقتنا مع أصحابنا
تقريبا انتهي نموذج صاحبك اللي يذاكر معاك
ويبات عندك
وتدخل عنده تطلب غدا

بقي فيه حسابات
يبقي هيموت من الجوع وبتعزم عليه بالأكل وهو ولا الضباب
ويخاف يذاكر معاك عشان متقرش عليه (جايز برضه)
عشان ألخص واخلص في نفس ذات الوقت
جربوا نعيش في مصر ولوفي خيالنا ولو ليوم واحد
مصر اللي محتاجة مليون مقال اكتب فيه عاملة ازاي وبقت ازاي
لكن مش هحتاج المليون مقال
لأني أعتقد ان الفكره وصلت
لو قريت المقال ده قبل ماتنزل الكلية أو قبل ماتروح شغلك
.شوف نفسك بعده هتشغل ايه وانت بتلبس وبتفطر
هتشغل ياصباح الخير ياللي معانا وبرنامج بصبح عليك
ولا هتشغل سبت حبيبي تلات أيام
ولو قريته في السهرة
شوف بعد ماتقفل الكمبيوتر
هتتفرج علي فيلم لنجيب الريحاني ولا هتتفرج علي ميلودي
وكفاية بقي لأني طولت في الموضوع زيادة عن اللازم ودمي بقي تقيل
تقيل طحن

لو ابـــــــــــــوها رفـــــــــع الســـــــــــماعة

لو أبوها رفع السماعة هتعمل ايه؟

تخيل سعادتك كده مأنتخ علي السرير الساعة اتنين بالليل ومضلم الأوضة ومسلك سلك التليفون من الصالة,وواخد غطس تحت اللحاف وفي وسط الأشواق الملهلبة...

بتحبني ياتوفيق؟

طبعا ياجمالات دانتي الهوا اللي بتنفسه والميه اللي بشربها.... ناقص تقولها سجارة البانجو اللي بتكيفني

يعني مش هتتخلي عني أبدا

عمري ياحبي وحتي تنطفيء النجوم

وحتي يقع القمر

وحتي يفوز الذمالك علي الأهلي

عيب تقولي كده ياجمالات

سمعتي أغنية بحبك بتاعة رامي صبري؟.

اه مالها ياحبيبي....

.كل كلمة فيها بتفكرني بيكي يانور عيني

بحبك نفسي أقولهالك وانا ايدي في ايد....

وفجأه.
نعم ياروح أمك؟

.وهنا هنقول ستوب ونوقف المشهد ونبدأ نسأل السؤال هتعمل ايه ساعتها؟أو نتخيل سيناريوهات مختلفة للي هيحصل بعدها
ممكن مثلا تقفل السكة وطبعا لمدة اتناشر سنه قدام هتلاقي البت تليفونها مقفول ومبتجيش جامعة.......والسيناريو ده يجرنا لتساؤل تاني

في الحاله دي تعمل واد محترم بقي وتروح تتقدملها وغرضي شريف واسف ياعمي وجاي من الباب والكلام ده

ولا تبقي واد روش موديل 2007 خارج من الاجنص حالا وتخلي واحدة صاحبتها تكلمها؟

ولا تطلع ندل وواطي وتنفض لأمها واهو البنات اكتر من الهم علي القلب وتيجي واحدة مكانها؟

ده سيناريو مكتمل محتمل للي ممكن يحصل
فيه سيناريو تاني

.نعم ياروح أمك؟......ده أبوها

ساعتها انت موش هتقفل السكة

ثواني ياعمي أنا والله بحب جمالات بس مستني وقت أرتبط بيها

وهنا هيختلف رد فعل الأب حسب شخصيته يعني ممكن يكون راجل جنتل ويقولك

حب ايه ياحيلة الست الحاجة روح ياض اشتريلك فانلة حمالات

وممكن يكون راجل عقلاني....

هو يابني اللي يحب حد يكلمه الساعة دي

لو اختك ترضي حد يكلمها كده؟

يابني اللي بيحب حد ميخلهوش يعمل حاجه غلط ولو حتي باسم الحب

.وعموما يابني ممكن أعرف انت عايز ايه دلوقت؟

وهنا هتبان نواياك

يااما تاخد منه معاد تقابله وتكلمه وتشرحله ظروفك

يااما تقول ياعمي انا نفسي اكلمها وافضل معاها سنتين تلاتة لحد مااكوم نفسي وطبعا بما أنه راجل محترم فرده هيبقي

.تك....صوت سماعة بتتحط وسكة بتتقفل في وشك
فيه سيناريو تالت

أنك تطلع واطي وسافل وكل حاجة وترد عليه

ماتشتمش يابا الحاج انت متلم بنتك ياأخويا

انا مضربتهاش علي ايدها

وطبعا رد فعل الراجل علي بق زي ده

يااما هيقع علي الكرسي من الصدمة وتسمع صوت (بابا بابا)

أو هيرد علي كلامك

ونظرا لأن دي مدونة محترمة فمش هننشر رد أبوها علي كلامك
وممكن يبقي فيه سيناريو رابع

أول ماابوها يدخل...هتلاقي جمالاات بتقولك

ثواني ياتيفا...بتدلعك ياعم مين قدك يابختك

فيه حاجة يابابا مخبطتش ليه قبل ماتدخل.

.معلش ياجمالاات اصلي كنت بدور علي حاجة معلش اني مخبطتش

.طيب يابابا عاوز حاجة؟

لا خلاص هدور في أوضة تانية

وفي الحالة دي يابني أبوها ده يبقي بعرور لا مؤاخذه وأنصحك تنفد بجلدك من العيلة دي
وفيه سيناريو كمان

.وده بقي محتاج واد ابن جنية

وهو انك اول ماتلاقي صوت أبوها فجأة ترقق صوتك وتتمسخر علي قد ماتقدر وتعمل نفسك واحدة صحبتها وعشان السيناريو ده ينجح فانت محتاج أب اهبل عشان يصدقه
أو ممكن حاجة أسهل انك تتكلم بمنتهي الأدب انك أخو واحدة صحبتها وكنت بتسأل عن أختك لأنها لسه مرجعتش

وفي الحالة دي يااما الراجل هيديك فاصل شتيمة في أختك وفي نخوتك وأخلاقك (أوعي تصدق نفسك وترد عليه لأنك مفيش أخت ولا حاجة)

أو ممكن يطلع الراجل تربية فكرية ويصدق ويقولك أما توصل يابني ابقوا طمنونا
طبعا أنا مقلتش الموضوع من ناحية البنت بمعني لو أبوكي رفع السماعة(موش تعصب ضد حكوك المرأه لا سمح الله)بس لأن السيناريو معروف

.لو أبوها راجل ودمه حامي

فيبقي اللي تقدر تعمله بس انها تكون لها علاقات في المستشفيات خصوصا قسم العظام

عشان يتوصوا بيها