Thursday, April 26, 2007

حــــــــــــاجــــــة تــــهـــبــــــل

ازيكوا ياردالة عاملين إيه؟
وحشتوني وحشتوني وحشتووووووووووووني
أهلنن.....ترات ترات تارا
أول إنبارح كان 24/4
طب يعني إيه؟
أكيد مادام كان أول إمبارح 24/4 يبقي إمبارح 25/4
إنت هتبتديها إستظراف ياض إنت ولا إيه ؟إرجع مطرح ماكنت يالا ولا إقفل البلوجاية دي
معلس معلس ياكماحة استحملوني أصلي أول امبارح كان يوم جميل أوي في حياتي
أكيد طبعا مش عشان متش الأهلي وبرشلونة
إيهيء إيهيء إيهيء
لكن ماعلينا ياريت محدش يجيب سيرة المتش ده قدامي حقنا للدماء
المهم اليوم كان جميل عشان دكتور زويل كان عندنا في الكلية وحضرتله ندوتين
ويمكن طبعا طلعت من الندوة دي بمليون حاجة علموا في دماغي وفي تفكيري
وفعلا الراجل ده عالي أوي بشكل فوق الوصف
لو عاوزين تعرفوا دكتور زويل قال تابعوا مجلة جوانا في عددها الجاي يوم تلاتين
ملحوظة هذا إعلان مدفوع الأجر وللإعلان علي بلوجايتي المصونة يرجي الإتصال وأشعارنا لا تقبل المنافسة
المهم المهم إنه بعد مالندوة خلصت وفي وسط مانا ماشي بقي مستكنيس أوي من الكلام وجوايا طاقة غير عادية
افتكرت قصة كنت قريتها في فانتازيا لأحمد خالد توفيق إسمها اللغز
فانتازيا بعد زويل؟....ده عبيط ده ولا إيه؟
القصة كان فيها جانب شوية حسيت أنه ممكن يكون فيا ولو بشكل بسيط
ياريت اللي قري القصة ميضحكش عليا أنا قلت ولو بشكل بسيط
ندخل في الموضوع
في اليوم ده وبعد ماكلمت دكتور غنيم واتصورت معاه وبعد ندوة دكتور زويل خرجت وانا جوايا حب غير عادي للعلم وطاقة فظيعة نفسي أفجرها وخلاص بقي هبدأ أشتغل وازاكر وأبحث وكان هاين عليا أسيب متش برشلونة واروح أقعد علي النت وأبدأ بقي الشغل اللي بجد بجد وهاتك يابحث بقي
أوووماااااااااااال..... مش لازم أخد نوبل في الطب بقي ولا إيه؟
الله مالكوا مستغربين ليه هو أنا مقلتلكوش؟
لا والنبي مقلتلكوش؟
اسكتوا ....مش أنا قررت (بعد تردد شوية)إني أخد جايزة نوبل في الطب؟
اه والله ...أنا
أيوة انا نفس السخص اللي كان بيعيط في البوست الأخير إنه لسه مافتحش المواد
لكن متضحكوش عليا وصضقوني هييجي اليوم ده وهتقعدوا تقولوا كان صاحبنا
كان بيعلق عندنا
وطبعا انا ولا أعرفكم وعموما سنة 2020 قربت أهي والشغل هيبتدي بس من بكرة إن شاء الله عشان النهاردة رايح لدكتور السنان وهشوف متش الزمالك والاسماعيلي(بشري سارة لمرضي الإيدز حاولوا تحافظوا علي نفسكم لحد سنة 2020 وساعتها هتلاقوا العلاج عن مستكنيس....الكمية محدودة بادر بحجز نسختك)خلاص ضحكنا كتير هنقضي البوست كله ضحك ولا إيه؟
نخش في الجد بقي
وفي وسط الأحاسيس الكتشير كتشير أوي دي قفشت نفسي ورجعت شريط حياتي وقلبت في زكرياتي لكن ملقتش حبيب وفالي ....لقيت خيبة تقيلة بعيد عن السامعين والقاريين والشايفين
البيه الموكوس اللي هو انا بغزالة ساعة هتروح وساعة تيجي وهحكيلكم ليه بس ياريت توعدوني متفقدوش إحترامكم ليا ولو فقدتوه وده الغالب فياريت متشوهوش سمعتي عشان أعرف أتجوز
اتفقنا؟
لا
يبقي اتفقنا
نتكل علي الله
في يوم من ذات الأيام مسكت قلمي وبدأت أكتب إيشي قصص وإيشي مقالات
وعلي فكرة جايلنا تشكيلة شعر حلوة من بورسعيد التلات الجاي
المهم كزا حد عجبهم كتاباتي وقالوا في حقي كلام حلو وإني أكمل وكده وناس نصحتني أبعت لجرايد شبابية وكده المهم بعتت وعجب الناس مبدأيا لحد كده كويس
اللي مش كويس بقي إني بقي بدأت أخطط لمستقبلي الأدبي المضمون طبعاوخلاص بقي طموحي نجيب محفوظ وباولو كويلهووجايلك ياأهرام جايلك اللي هيمسك رئاسة تحريرك وبدأت بقي أكتب مقالات كتير وأقري وهوب الناس بتوع الجرايد كلموني ووسط مانا بتنطط عليهم بقي وهتنشروا المقال بكام؟ لقيتهم بيقولولي الاسلوب كويس والكلام كويس وعاوزين نقابلك وتجيب حاجات جديدة عشان نقرب وجهات نظرنا.....الله؟ يعني مقالي مش هينزل صفحة أولي؟
لاأاااااااااااااا
وساعتها كإني شفت أختي بتاخد قلم من الدرج بتاعي(دي يروح فيها رقاب)احبطت بقي وخلاص وأنا أشوف مشروع تاني غير المشروع ده وياإما أبدأ رئيس تحرير ياإما يفتح الله
ومرت الأيام وفي يوم كده كنت مكتئب وقاعد مع واحد من صحابي بنشوف فيلم أوقات فراغ فبعد الفيلم خرجت في موجة اكتئاب غير عادية
وهنعمل إيه بقي ؟ ماهي الدنيا كده ومحدش مهتم بينا ولا سامعنا
وعشت فيها الدور بقي
وكان هاين عليا أروح أشرب عشيش
حد مين اللي مش سامعك مانت يابني أمورك شغالة والصورة مش وحشة أوي
الله؟......يعني أنسي مشروع الانحراف المبرر ده؟
اه طبعا
طبعا؟....دانا خلاص بدأت أجمع نمر بنات منحرفات واديت مسد لسنية رنة
لا خلاص انسي المشروع ده
أوكي ننفض للحوار ده
ومن حوالي أسبوعين كده حضرت ندوة تنمية بشرية لفريق زدني وطول عمري من قبل ماتولد مغرم بالتنيمة البشرية المهم إني أعجبت أوي بالمحاضر خصوصا إنه كان خريج طب زميل يعني
الله؟ طب متشوف حوار التنيمة البشرية ده ده بيجيب تاثير حلو مع الناس
وعلم متقدم جدا غايب عن كتير مننا في مصر
خلاص يبقي أشتغل في التنيمة البشرية مع فريق زدني
ههههههههههههه
ماعلينا
وتمر الأيام وييجي اليوم الموعود اللي هو بتاع أول إمبارح وأبدأ بقي أفكر في العلم والطب والبحث العلمي
الله طب انا زعلان ليه ولاممكم حواليا ليه؟ ماهو كويس إني أعيش الحالة دي
علي الأقل مش عشاني ....عشان مرضي الإيدز والسرطان حتي
الفكرة ياإخواننا إني حقيقي بفكر في الحالة دي
هو أنا هوائي مثلا؟ ولا دي حاجة فينا كلنا في زمن اختفت فيه القدوة لينا؟
يمكن أنا ميال للحل التاني لأني بلاقي الحالة دي بتحصللي أما بشوف حد بيبهرني
يمكن أنا مش عاوز أحكيلكوا عن التقيلة لحد دلوقت
يوم حوار أبو تريكة مع مني الشاذلي كان مشروع ليا إني ألعب كورة في الأهلي وأبقي لعيب كبير لكني وقفت عن المشروع ده عشان مش فاضي ومش بعيد يجيلي عرض إحتراف وأسيب صحابي وأهلي والمجتمع والناس ....يبقي بلاشه المشروع ده
حقيقي والله مش لاقي تفسير للحالة دي ومش قادر أفهم برضه ليه بتختفي؟
هيا مبتبقاش حاجة غير عقلانية أو حاجة مستحيلة بالنسبة لي
يعني مثلا بالنسبة لموضوع الكتابة أنا مش وحش بس طبعا مش هبقي نجم أو حاجة كبيرة من دلوقت
وبرضه بالنسبة لموضوع العلم والطب فده شغلي والمفروض ادوس في المجال ده والمفروض طبعا إن نتيجة تراجعي عن موضوع نوبل في الطب والتعيين في الجامعة ميبقاش إني أعدي بمادتين
وهو ده مربط الفرس
ياتري سبب عدم التركيز في مشروع معين وهدف معين هو عدم الثقة في الإمكانيات؟
ولا إني بختار هدف بعيد أوي؟
ولا إني مش قادرأحدد هدف فبشبط في أي حاجة بتيجي قدامي؟
ولا دي حاجة عادية وبتحصلكم ؟
مش هعرف أطول عن كده عشان هقفل البلوجاية وأفتح جوجل
عايز أدور وأجمع معلومات عن معبد فيلة ومعبد الكرنك ماهو مينفعش إني أبقي جاهل بتاريخ أثار مصر والفراعنة هو مش المفروض إني أنطلق للمستقبل من تاريخنا القديم ولا إيه؟
وبإزن الله أتخرج وأقضي تكليفي وهألاقي توت عنخ أمون الحقيقي لأني عندي إحساس إن اللي في المتحف المصري تايواني
ولا إيه؟

19 comments:

Halawa said...

باشا عودا حميدا
مش كنت تقول انك راجع كنا فرشنا النت بنزين
ولا خليها جاز علشان رخيص
الحدوتة ياسيدي الفاضل بحث عن الذات
ولأنك حضرت عند زويل
بتهيألي هو قال انه محلمش بحاجة من اللي هو فيها
الفكرة سلمة سلمة زائد كوكتيل طموح وجموح
خد بالأسباب
وساعتها الحلم هيبقى حقيقة أكتر مما تتخيل
ماتشوفش النتيجة الأخيرة وتقول عايز زي ده ياعمو
شوف هو وصل كده ازاي
أبو تريكة زويل زدني
كله طفح كوتة ياباشا
محدش بيآخدها بالساهل

أهم حاجة أحبك تحطها حلقة في ودنك
دوس متخفش
ومش أي حد يقولك انك وحش أو يقلل منك
أو تصاب بكبوة يبقى انت وحش
محدش يعرفك غيرك
انت اللي هتقوم نفسك

تحياتي

sakayar said...

أهلا بعودتك سيد مستكنيص ...هيه ممكن تكون انبهار بالشيء وإنك تشوف كل واحد ناجح في مجاله تعجب بيه فتحب غنك تبقى ناجح زيه ... بس مش لازم تبقى ناجح في المجال اللي غيرك نجح فيه ...ممكن تبقى ناجح في مجالك انت ... وتقريبا ده اللي انت وصلتله في الآخر ... إني أنجح في رسالتي أولا ... طالب طب ... ينجح في الطب ... أما بالنسبة لجوجل وآثار مصر والكلام ده ... سامحني ... ما تبحث عن الاسلام أحلى؟؟؟؟
بدون زعل

3ashe2elro7 said...
This comment has been removed by the author.
3ashe2elro7 said...

حاجه اتعلمتها من فريق زدنى بتاع التنميه البشريه انى احدد الاول اهدافى و ترتيب الاهداف دى و اولاوياتى ف حياتى و اللى الاقيه و انا ماشى ف طريقى يتناسب معايا اخده و اللى مش الاقيه يتناسب لأ معلش مش مناسب ليا
مينفعش بعد ما احدد اللى انا عايزه الاقيه حاجه تانيه احلى اقول الله دى حلوه اوى و اشبط فيها زى العيال لانى كده بضيع مجهودى اللى عملته فى السكه اللى ماشى فيها
ممكن ايقى ابوتريكه وزويل و نجيب محفوظ كمان فى مجال تانى خالصص و هوه الطب مثلا اللى انت فيه
محدش بيحقق نجاحه زى التانى
كل واحد نجح كان له طريقته ف النجاح ومعادلت هالخاصه بيه
النجاح معادله خاصه جدا و كوكتيل من الطموح المعقول المحسوب كويس بعيدا عن التهور و الجموح بالاضافه الى المجهود و الاصرار

Eman Eltaher said...

أهلا بعودتك الجميلة

خفة دم جميلة و متناهية كالعادة

بس مش غريب شوية انه يوم ما الواحد يقرر انه يدخل مجال معين يبقى عايز يكون فيه رئيس المجال ؟؟؟؟ حرام عليك دا انا نفسى أنى أنشر أى كتابة ليا و لو هيحطوها ف الهامش مش أكون رئيسة تحرير !!! يا بلاش !!!! يا فرختى

ما كانش حد غلب لو كان الموضوع كده بالساهل

كل الناس اللى عايزة تحقق طموحها لازم تبتدى من الصفر و بارادتها و حماسها بتعلى درجة كل شوية

اتكل على الله و بكره لما أشوفك ف صفحة الحوادث أقول هوا ده اللى علق على مدونتى

و اسيحلك بقى

هههههههههههههه

تحياتى

محض روح said...

ياه مكنتش متصوره اني ممكن اشوفلك حاجه بعد ماتش الاهلي وبرشلونه
ده انا جه فبالي انك ممكن تعتزل الكتابه هنا
:)
مش مهم خير بص يا استاذ مشكلتك تتلخص في كلمتين لا ثالث لهم
انته عايز تعمل الف حاجه في نفس الوقت الطموح حلو يامحمد
بس لزم تعرف انته عايز ده ليه

عيز تكتب طيب ايه الي الكتابه هتديهولك وانته هتديها ايه

عايز تاخد نوبل ماشي انته عايز تاخد نوبل ليه علشان تبقى مشهور ولا علشان تساعد الناس

مانته ممكن تسعدهم من غير ماتاخد نوبل
ياعني الي عايز نوبل لمجرد نوبل عمره ماهيوصل ليها

رتب ورقك وشوف انته عايز ايه
حدد خطوط عريضه وصدقني كل هدف بتحققه هيفتح ادامك باب تاني
حط وقت لكل هدف ولو معرفتش تحققه روح لغيره
خلي احلامك محدده بوقت علشان مضيعش عمرك
تجري ورا احلام

بس دلوقتي ركزز في حاجه وحده
الأمتحنات قربت
:)

ربنا معاك
يا اخي العزيز

MaMaDo said...

حمد الله على السلامه يا مستكنيص
ولكم باك
الو الو
تيت تيت تيت تيت
يووووووووو
تييييييييييييييييت
الو انت بتقفل فى وشى يا مستكنيص
ماشى....
.........
عمومز
انا مستنى موضوع زويل عشان حلاوه قالى انه جامد خلصه بقى و ابعته عشان اشوفه
انا بس عايز اعقم على موضوع التنميه البشريه
لانه جامد اوى
كان فى كورس حضرته فى هندسه
بجد انا قبل ما اروح كنت شايف بكره ده النور قاطع فيه
بس هما فى الكورس ده ادونى كشاف صغير و عرفونى ازاى اصلح النور المقطوع دع
و كانت اول حاجه اتعلمتها
ان انا اعرف نفسى الاول و بعد كده على الاسس الى وصلت ليه
تظبط نفسك و تحاول توصل
هو لاكلام كتييييييير اوى
بس مش هطول عليك عشان احنا دخلنا فى الدقيقه التلاته كده
سلاااااااااااام بقى
و حمد لله على السلام
اقفل بقى
يوووووو اديك تدخلت فى الربعه
حولى خمسه بقى
متنساش

Menas said...

عودا حميدا
ان شاء الله تاخد نوبل فى الطب
يعنى اللى بياخد نوبل احسن منك فى ايه
كلنا بشر
ولو رمزنا وصممنا هنوصل للعايزينه
ان الله لا يضيع اجر من احسن عملا
انا بتكلم جد

وسعتها هنقول ده اخونا ونفتخر بيك فى كل مكان
زى دلوقتى الضبط
هتلاقى اخواتك كتير الناس هتستغرب العدد د كله

Menas said...

بص يا مستكنيص
انت لما بيبهرك حد مش بيتقى عايز تبقى نسخه منه لا
الحكايه انك بيعجبك الجانب الناجح فىشخصيته
واصراره اللى وصلوا للهو فيه

مش وحش انك تبقى كاتب
او تاخذ جايزة نوبل فى الطب
شوف ايه الاساسى منهم عندك
واللى حاسس انك نفسك تحققه
يعنى الحاجه اللى تحسها هى هدف جد

يعنى ممكن تلاقى ان الط وجايزه نوبل هو هدفك الحقيقى
بس انت بتحب الكتابه
مش معناه انك تسيب الكتابه
لا انا اركز اوى فى هدفىواديلوا الاولويه
وفى نفس الوقت انملى موهيتى
يعنى ممكن يبقى ليك مقال ثابت فى جريده او مجله
بحيث تشبع الجانب الادبى فيك
او كل فتره تعمل كتاب او قصه وتنشرها للناس وتبقى كتاب يتباع
وهكذا
يبفى انا مسبتش الطب وفى نفس الوقت مقفلتش الابداع جوايا

ياريت اكون وصلتلك اللى عايزه اقوله
وتكون فهمت واساعدك انك توضح الرؤيه عندك

الانسان ممكن يعمل كل حاجه بس فى اولويات
اقولك اقرء حياة انشتاين وانجازاته
الراجل ده كان راسم وفى نفس الوقت
ليه فى الفيزياءوالرياضه وغيرها وغيرها
كتير
اقرء عنه كتير



المهم تشوف ايه الاساس عندك ونفسك تحققه الكتابه ولا الط
يعنى ممكن تبقى الكتابه
وده مش معناه اسيب الطب
بس ممكن تبقى كاتب
وفى نفس الوقت تكتشف حاجات فى الطب او تقدم نظريات

معلش طولت عليك بس بحاول اساعدك

عالمى ازرق said...

الاول البوست ضحكنى بجد
اسلوبك رائع
ثانيا بقي اللى بيحصلك ده بيحصل فى احسن العائلات .. ويمكن يكون سببه اننا مش عافين ننظم حياتنا ازاى نكتشف قدراتنا واللى نقدر ننجح فيه ونحدد عايزين نوصل لايه ؟ وهنوصله ازاى؟
وكمان التشجيع .. حاجه مهمه جدا والله ان اما تزهق حد يقولك انت خلاص قربت كمل
مبروك عودتك

الخيط الرفيع said...

في كلمتين

اول ما تبدأ تحس انك عاوز تعيش صح بتخبط كدا
ودا عشان ما أتعلمناش نفكر صح من صغرنا
بس عيزة أقولك ركز بسرعة مفيش وقت ومن الذكاء تحاول تستغل الإمكانيلت اللي معاك
اقصد كليتك أولي بخاصة انك في كل المجالات هتبدأ من الصفر فركز تبقي دراسه وهوايه ومجال شغل و
طموح مستقبلي

كله في واحد

ودوس كويس ربنا معاك
وممكن باقي اخواتك الي هما احنا نحقق بالنيابه عندك باقي الاحلام
ربنا ييسر لك أي طريق تختارة

ثورة said...

الخيط الرفيع ردها فكرني أما كنت بحلم بالجملة ... مش بالقطاعي يعني
يعني أقول أنا هقوم بدور مناشد العدالة و بسمة وميناس و مين هيشيلوا الإعلام وابتهال ورباب هيشيلوا مجال التعليم ومعرفش مين هيصلح مجال ايه ومين تاني هيصلح ايه تاني
أنا عماله أحلم وأحطهم ف الأحلام اللى انا مش هعملها
من أكتر الحاجات اللى بقول عليها ضرورية نقطة إني أحدد دوري
مينفعش أعد أتفسح بين الأدوار كده هعمل مجموعة تجارب لم تكتمل
وهعطي مجهود كبير جدا من غير ثمرة
هو ده على فكره اللى أقصده بالتخصص
ممكن أشارك في الأدوار التانيه وأعرف عنها
لكن أركز في دور واحد
شامه ريحة قاعدة أول أور نن ف أحلامك قوي فاكر ؟
على فكره كلنا في بداية أي شيء بنحلم إننا وصلنا لقمته
أما بنبدأ نطلع بجد بقى بتتغير تصورات كتيييييييير
بس الحاجه الوحيدة اللى مش لازم تتغير

إن القمة كانت الهدف

الخيط الرفيع said...

شفت الكلام بتاع ثورة

دماغ والله العظيم يا بنتي



بس الحاجه الوحيدة اللى مش لازم تتغير

إن القمة كانت الهدف

هو دا الكلام

أنا كنت رجعت عشان أكمل

لفت نظري أنك عاوز التميز
بتدور علي صاحبه في كل مجال
حبيت التميز
جميل باقي تحب حاجة تتميز فيها

يلا ولا تضيع وقت

خليها في الطب
واديها جايزة نوبل في الطب

ولو معرفتش تأخدها جهز حد من تلمذتك ليها خلي طموحك لاحود له ولا ينتهي
عند شخصك فقط
عيش بالحلم وللحلم
ربنا معاك

أميرة البلطجية said...

يا خبر ابيضضضضضضضضضضض
ايه ده..اخيرا حد زيي
انا بقي لو حكتلك عليا
حتتهبل اكتر واكتر
دانا يا ريت على كدع وبس
دانا بفتح كذا موضوع في وقت واحد
حد يصدق يا مؤمن ان فيه واحدة تقدم ماجستير هندسة ودبولمة ترجمة في وقت واحد
ملحوظة: الواحدة دي كانت بتشتغل شغل اد كده
انت برجك ايه ابني؟
اكيد جوزاء
الجنان ده بتاع الجوزاء مخصوص
اسفة
مش حقدر انصحك ولا اقولك اييي حاجة
الهم طايلني وطايلك
بس بوست تحفة
تحياتي

أخف دم said...

ازيك يا دكتور
ما دام انت مهتم بالتنيمية البشرية يبقى انت أكيد عارف ان أةل خطوة للتقدم او لتحقيق الهدف هوه تحديد الهدف نفسه .. مشكلتك انك الحمد لله متشعب المواهب أو ربنا مديلك كام اتجاه بس انت مستحيل تنجح فيهم كلهم لان كل حاجة محتاجة وقت وجهد واتجاه هتمشى فيه .. حدد وجهتك الأول يا دكتور وانت هتلقى المسألة سهلة ان شاء الله.

علاء عارفين said...

سلامو عليكم

يبدوا يا دكتور ان هي الكليه دي بتعمل فينا كده

عادي يابني ...عادي جداً

او كما يقولون

join the club

StRoNg MeDiCiNe said...

دى أول زيارة ليا

على مدونتك

عجبتنى جدا

شديدة مووووووووووووووت

والبوست كمان عجبنى أوى

انا سعيد انى اكتشفت مدونتك الروشة دى

شد حيلك يا عم المستكنيس

بسمه عبدالباسط said...

حمد الله على السلامة
بوست هايل قوى

Rosa said...

يا عيني يا دكتور ,لا الحالة صاحبة فعلا :D
ماتزعلش يا مستكنيس و متحيرش نفسك عشان دي حالة ناس كتير منا او بمعنى اصح معظمنا , نتيجة حاجات كتير و عوامل كتير اتربينا عليها , ابتداءا من اول ما كنا في المدرسة لحد تعاملتنا اليومية , والي خلتنا نوصل لللحالة دي , نتحمس لحاجة قوي و نفتكر اننا هنعمل و نسوي و بعدها نفقد طاقتنا , على العموم ,ومن خلال دراستي اكتشفت حاجه كدا هبقى اكتب عنها بوست ممكن تلاقي تفسير فيه عن الي بيحصل
, انتظرونا في السواق قريبا في شرائط وعلى سي دي
تحياتي يا دكتور