dr_mestekanyas
**********
وده بقي موضوعنا النهارده
**********
الباسووردات
لو بصينا في نفسنا كده وفي حياتنا هتلاقيها بقت مليانة باسووردات
يعني باسوورد الايميل
وباسوورد حسابك علي البلوجر
ولو جت تعليمات من الحكومة إن اخواتك الصغيرين ميقعدوش علي الكمبيوتر(إيه الرخامة دي؟)عشان مزاكرتهم يبقي هتلاقي باس وورد للكمبيوتر
ولو انت دبلومازي أو دكتور مثلا أو رجل أعمال يبقي هتحتاج واحدة للشنطة الزنزونايت
أو ممكن نقول الباس وورد بتاعتك علي مكنة الماستر كارد ربنا يوعدنا يارب
ومن هنا بقي نقف شوية ونهدي السرعة ونسأل سؤال رخم شوية
ياتري باسووردك ايه؟
سألت السؤال ده لناس كتير وأخدت إجابات كتير
يعني مثلا واحد قاللي رقم موبايل واحد صاحبي
وواحد قال رقم البيت بتاع مروة..متبقاش غبي مؤكد مروة دي مش بنت خالتة ولا بنت عمه
يعني لقيت شريحة كبيرة باسوورداتها رايحة ناحية ارقام التليفونات
وواحد قاللي باسووردي هيا إسم الايميل بس بحروف كابيتال... لأصايع يالا
وواحد قاللي باس ووردي 8755789854 ايه العبيط ده هوأنا
بقولك عندك كام سنة؟
وناس قالولي باس ووردي معرفش انا مختارها علي اساس إيه
وأنا يمكن من الناس دول يعني باس ووردي هيا رقم التليفون القديم لواحدة زميلتي كنت بكلمها من أربع سنين وحولت لجامعة تانية ومعتش بكلمها من سنتين ونص
ههههههههههههه حد فاهم حاجة؟
يعني باختصار فيه نسبة كبيرة من الشعب بيحطوا اللي ييجي علي بالهم ساعة اختيار الباس وورد
وهنا بقي أعدل النضارة الكعب كوباية وانزلها علي مناخيري وأبص من تحتيها
خبير ياولاد؟
وأبدا اسأل بقي السؤال اللي هاخد عليه جايزة نوبل في الطب
ياتري وانت بتختار باس ووردك بتختار حاجة بتحبها وغالية عليك لدرجة إنك عاوز تكررها كتير أثناء انشطة حياتك المختلفة؟ .... مروة مثلا؟
ولا بتحب تختار حاجة غامضة شوية تكون مجهولة بالنسبة للناس حواليك زي مثلا تليفون البيت بتاع مروة؟
لو دورت هتلاقيها باس وورد لا غامضة ولاحاجة وهتلاقي تليفونها مع نص الشعب
إحم إحم
ماعلينا إحنا جايين نهدي النفوس.... مروة دي أخت عزيزة علينا كلنا
ولا الموضوع ميمثلش بالنسبة لك أي حاجة وبتختار اللي ييجي علي بالك وخلاص وأنا بفت في الفتة وبتكلم في حوار مالوش لزمة
وهاين عليك تقوللي امشي ياض من هنا واقفل مدونتك عليك؟
ومن إجابات سعادتك أو سعادتك بكسر التاء_ عشان ميقولوش بنضطهدهم وحكوك النسوان والكلام ده_ أقدر اديك وجهة نظر طلعت بيها من الحياة دي
يعني لو بتحب تختار حاجة غامضة ومختفية فانت واخد الباس وورد نوع من اجراءات الأمن ومخون اللي حواليك أو حاسس إن ممكن حد تعرفه يحاول يخمنها ويخترق اميلك فبتحاول تجيب حاجة تبقي أبعد مايكون عن تفكيرة لانه أول ماهيجرب هيجرب رقم موبيلك مثلا ....تاريخ ميلادك ....تليفون بيتك وهكذا
ولو بتختار حاجة حاجة انت بتحبها أو مالوفة ليك فانت واخد باس ووردك نوع من الخصوصية مش أكتر وإجراء عادي فبتميل لحاجة عزيزة علي قلبك زي مثلا اللي بيسمي ابنه علي اسم حد بيحبه(حبيبتة الاولانية مثلا)عشان يكررة كتير علي لسانه فانت ممكن تبقي من النوعية دي مع الفارق طبعا
ومش هتكلم عن اللي هيجاوبوا عن السؤال التالت بنعم لانهم غلطوا فيا وميستاهلوش
يانهار أسود دول جايين ورايا أما ألحق أدخل مدونتي واقفل بباسووردي عليا لاحسن يحصلوني العمر مش بعزقة
سلام ياجماعة
**********
13 comments:
مممممممممم
اول تعليق
والله الباسورد ده بيكون مشكله بجد
وفعلا بيبن الشخصه صحبه والكلام مش هزار
كل ماالخوف بيزيد كل مارقم زاد
بس فيه ارقام بتكون عزيزه علينا
وكمان اسماء فبنحب نعملها يمكن علشان نفتكرها ديما
مش عرفه اقولك ايه يامحمد الصراحه
بس هو فيه سؤال بعيد عن البوست وعرفه طبعا انته مش هتبخل بلاجابه
انته هتخصص امتى ان شاء الله؟؟
:)
بجد بجد اسلوبك جميل جدا يا دكتور
انا عن نفسى اول باسورد فى حياتى كان رقم تليفون الحب الاول بس مكانتش مروة يا عمنا
بعد كده بقيت اعملها تركيبة من ارقام تليفوانات بتعامل بيها بصفة مستمرة وغالبا بتكون اصحابى
يعنى اول رقمين من موبايلات تلاتة اصحابى وازود عليهم حاجة من عندى وده بيكون بالاضافة لكلمة كمان
والباسورد بالنسبالى اجراء امنى فعلا
لان ايميلى واصدقائى على الماسنجر و كمية الرسائل اللى عليه فعلا متتعودش
واان ربنا رزقنى قبل كده بعيل صغير سرق ايميله وغير الباص ونسيه وبكده ضاع ع الفاضى
عرفت بقى انا محرص اوى ليه
شكرا ليك على البوست
وتحياتى
انظر يا سيدي المستكنيص احب اقولك ان الباسورد مش شرط بتعبر عن ارقام و حاجات من دي و علي فكره التفكير ده مش بيبقي في العالم كله ده في الدول العريبه تقريبا بس علشان وصلتلهم التكنولجيا متاخره و كمان بجهل ياعني هقولك علي حاجه لو جيت سائلت بره مثلا الشباب من شريحة عمرة 15 ل 23 هتلاقي ان كلها حاجات مرهقه لو جيت من الشرايح الي اعلي من كدا لسن مثلا 40 او حاجه زي كدا هتلاقي انهم بيستعملوا الي حد ما التطبيق التكنولجي علي حسب طبعا اختلاف المستخدمه زي الايميل و هكذا يعني مثلا تعالي شوف بيقولك ايه علي الباصات بتاعت الايميل المفروض انها بتبقي كبيره حاول متخليهاش صغيره و تبقي حروف و ارقام غريبه علشان تبقي ضامن سلامتها من السرقة المفروض الناس تبقي فاهمه كدا ان اتباع الارشادات ده شئ ضروري ولو بصيت بره هتلاقي انهم فعلا بيطبقوه
أتشرف بالتعليق على سيادتكم مستكنيص أفندي أباظة
الباسوورد يا حضرت مش بيتوقف على المعزة ... ولا على عدم الثقة ...لكن بيبقى وليد اللحظة... ومش علشان الشعب عرف الباسوورد بتاعك هتكتب عنه بوست ... فيها إيه لما يبقى فيه خمسة وصفر مثلا؟؟
ما هو الميل مش بتاع جهاز امنى خطير و لا بتاع حتى مركز ناسا يعنى
اللى يدخل يدخل يا عمنا و خلى الشعب يعيش
و لا ايه
الا صحيح انت مش ناوى تغير الباسوورد بتاعك اللى انا عارفها
دخلت امبارح ولقيتك مغيرتهاش
شكرا ع الثقه الغاليه دى
طبعن انا بهزر انا مدخلتش و لا حاجه هوه
ايه الافكار دى يا مستكنيص
بد افكارك جديده وحلوه
اما بالنسبه لموضوع الباسورد لنت بيتهيالى ان فى ناس بتعمله على اساس حاجه متقدرش تنساها
لانه سعات لما بيبقى وليد اللحظه بيتنسى وسئل مجرب
أنا شخصياً الباس وردي واحد عمري ما غيرته يعني تلاقي باسورد الميل زي باسورد البلوج زي باسورد يوزر نيم بتاع الجامعه كله واحد..وهو رقم تليفون بيتنا اللي في جده لأني بحبه جدا دا سبب والسبب التاني اني فاشله في حفظ الارقام والرقم دا كان الرقم الوحيد اللي حفظاه لانه كان سهل جدا وبس خلاص
سلامو عليكو
بجد انك دوك مستكنيص ودماغك عالية يا عم
عمري ما فكرت في الحاجة دي
شوف ,, هي نظرياتك كلها صح ,, وبتحصل مع اغلب الناس ,,
انا عندي مشكلة نسيان الباسوورد في الايميلات والمنتديات ,, والنظرية الي متبعاها دلوقتي اني بستخدم نفس اليوزر نيم والباسوورد في كل المنتديات ,, ونفس كلمة السر باختلاف الحروف الكبيرة والصغيرة في الايميلات
ولما بغيرها كل فين وفين بحط كلمة ليها علاقة بالكلمة القديمة علشان لما احاول اتذكر يكون في لينك منطقي بين الكلمتين :D
بس كدة!
كلام
copa
كمان صحيح والمفروض نفكر فيه !! بس هي كلمة قالها عاشق الروح ,, لا احنا مكتب الاف بي آي ولا المكتب البيضاوي
هاهاهاهاها
سلامات بقى
سيبوا مروة في حالها بفي
اسلوبك حلو
ويضحك جدا
المهم
انك لازم تغير الباص ورود
عشان شكل مصر كلها عارفاها
انا من كتر ما بنسي عندي كل حاجه
علي النت بنفس الباسوورد
هههههههههههههههههههههههههه
الموضوع جميل
بالنسبة لي اختيار الباسوورد لما جيت اختاره كان عشوائي جدا من الناس اللي أعرفها
أصل جاه في بالي ساعتها لما كانوا بيجربوا كلمة السر في جهاز بات مان في الفيلم
و دي كانت غلطته
فحبيت أطلع أحسن من بات مان
جامد يا دكتور مستكنيص
Post a Comment