الإنسان المصري بحكمه متدين ماشاء الله مولود علي السجادة
عشان كده تلاقي موضوع الحلال والحرام بيفرق معاه جدا
لكن بما إنه الانسان المصري بجبروته وقوته
والسبع تلاف سنة (من يوم ماتولدت وهما سبع الااف مازادوش يعني) شقاوة وتفتيح دماغ
عمل لنفسه حلاله وحرامه الخاصين بيه
حاجة كده ميد إن ايجبت خلي الناس تيجي تشوف الصناعة المصرية بخير
أو نقدر نقول إنه عمل
edit
شوية في المجال ده
الحلال بقي عنده له مجالاته اللي عمل فيها حبة تظابيط
زي النميمة
يفضل يتكلم ويجيب في سيرة ده ودي
وفي الاخر يقولك احنا مالنا احنا عندنا ولايا دع الخلق للخالق
وتقريبا الصفحة اللي فيها الأية بتاعة
اتامرون الناس بالبر وتنسون انفسكم
مقطوعة عنده من المصحف
لأن اشطر حاجة ممكن المصري يعملها
انه يفضل ينقد وينقد والحاجة دي راكباه من ساسه وراسه
يعني يتكلم عن الكوسة والرشوة اللي ماليين البلد
ولو رحتله الشغل هتلاقي ابن خالته وابنه وبنت أخوه متعينين عنده
أما النفاق فهو يعزه أوي
ورايه فيه إنه يجوز كما قال البحبحاني
فتلاقيه نازل مدح في رئيسه
ايا كان بقي رئيسه في العمل
ولا رئيسه في البلد
وهاتك ياكلام واشعار عن مزاياه والنجاح اللي تم بفضل وجهة نظره
وتخطيطات جلالة سعادة فخامة عظمته
ويمكن ده منتشر في فئة كبيرة جدا جدا من الشعب بتوصل للإعلام وفي الصحف
(راجع الصحف أخبار أهرام جمهورية)
ومن الحاجات الحلال اوي وبنعرف نطبقها أوي
حتة ازكروا محاسن موتاكم
يااااااه تقولش الحديث ده نزل عشان المصري
تلاقي الواحد من دول يموت من هنا وايه؟
معلقات عن الخير اللي كان بيعمله
وعن طيبة قلبه
وعن كفاءته ومحاربته للفساد
وناقص يكلموك عن فتحه للاندلس
في حين تلاقي لو عندك زاكرة شوية
وتفتكر كلامهم عنه قبل الموت
أو تعاملهم معاه
تلاقي انه كان زي طفلة الحشرة
وتلاقي تاني يوم موته في الجرايد صفحتين قصاد بعض
وكل واحد بقي قايلك بق من نوعية
فقدنا الاستاذ والاب
رمز يصعب تعويضه
يوم اسود علي السينما المصرية
الأهلي يواجه انبي...... إحم لا لا اسف انا يظهر عديت علي صفحة الرياضة
مش بس كده ده مثلا بعد مايموت بسنة وجاية الزكري السنوية
تلاقي ولا الضباب طب فين ياجماعة الحب الحب؟
فين الكلام اللي محسسنا انكم خلاص مش هتتنفسوا هوا بعديه؟
تلاقي كله راح
ويمكن لو جيت سألتهم عنه؟
مش بعيد حد يقولك
مين؟ مش الطويل الرفيع ده؟
ياعم ده كان سلام سلام يعني
وعندنا مثال صالح سليم
سنة وسنتين بعد مامات الدنيا كانت ضلام لإدارة الأهلي و لكل الاهلاوية
انما بعد خمس سنين مثلا
عدت الزكري السنوية بتاعته اول شهر مايو ده من غير مانحس بيها
غير في كام موقع لجماهير الاهلي
وطبعا مش المطلوب اننا نفضل نعيط علي الميت لمية سنة
بس هي فكرة الازدواجية والتضاد الواضح أوي في تعاملنا مع الميت
ومن ضمن الأحاديث اللي بينساها المصري
(الساكت عن الحق شيطان أخرس)
لو اتطلبت شهادته لصالح حد غلبان قصاد حد كبير او حاجة زي ده
تلاقيه عامل عبيط
وولا معبر ويقولك ياعم أربي عيالي
وممكن يطلع صايع ويجيبلك دليل ديني يدعم وجهة نظره
ولا تلقوا بايديكم الا التهلكة
وحاجة زي دي تفتحلنا سكة تانية من سكك حلال المصري
يؤمن بالابداع والتفكير في الدين
وعنده الثقة انه هيطلع تفسير جديد للقران غير اللي سبقوه
عشان كده بنلاقي ناس تستشهد بايات واحاديث علي مزاجهم وبالظاهر
حاجة كده زي ولا تقربوا الصلاة
مش عارف مين اللي يقولك ان المفروض ان ميراث البنت يبقي زي الولد
عشان الست بقت بتشتغل
والقصة مبقتش زي زمان
تقولش الدين ده كان مثلا موديل قديم ونزل منه نسخة جديدة فنعمله أبديت
ومن ضمن الحاجات الحلال
المصري في تعامله مع الناس
تشوف تعامله مع حد غلبان أو منكسر ايشي اشتغالات علي تريقة
وطبعا ده مبيبقاش حرام
لانه بيتاخد انه روشنة أو شطارة أو خبرة وحنكة في الحياة
بدون بقي مايعرف إنه ممكن بمواقف زي دي يربي عقد عن الشخص ده أو يحقر منه
أو يقلل ثقته بنفسه
أما بقي الحرام
فتلاقي مثلا من أكتر الحاجات اللي يستحرمها
لو مردتش السلام
أو لو مقلتش بسم الله قبل ماتاكل
ويزعل أوي لو اكلت او شربت بايدك الشمال
ولا بقي لو موبيلك رن وانت بتصلي
وموقف مثلا زي لما تكون بتتكلم في الموبيل في الاتوبيس مع واحدة
تلاقي البصات هتحرقك والغمزات واللمزات تقولش بيشوف حفرية فرعونية
ولو سمعت أغاني
ومش أي أغاني
لو أغاني شبابية وعاطفية يبقي حرام
أما لو لأم كلثوم أو حليم أو فيروز او منير أو وجيه عزيز
فيبقي لا
انت واد دماغ ومثقف
والمفتي قال يجوز
وحليم حلال ياحازم
والله الفكرة ماهي تريقة أو سخرية من اللي متمسك بدينه
بالعكس والله
انما الفكرة في الناس اللي بيمسكوا في الحاجات البسيطة جدا
ويسيبوا أهم حاجات
مش معني كده إني بقول أو بسخر من إننا نسمي قبل ماناكل وناكل بايدنا اليمين وكده
لا طبعا
لان دي حاجات في ديننا
وواجب نعملها بس اكيد طبعا منكتفيش بعملها ونسيب أهم حاجات في ديننا
الحاجات اللي فعلا ممكن تخلينا نتقدم ونقف علي رجلينا
لأن عمر ماكان الإسلام دين منغلق ولا دين متاخر
الإسلام لو طبقناه صح هنسود العالم زي ماأجدادنا سادوه بالإسلام برضه
بس أكيد ماهوش بالإسلام بتاع خطيب ابو دقن ومقصر الجلابية
ومبياديش شغله صح ومقضيها واسطة ونفاق
نموزج زي ده كتير أوي
وللاسف مصر دولة تبدو متدينة أو محافظة
ورغم ده بنتاخر يوم عن يوم
وأكيد تاخرنا ده مش بسبب مسئولين أو ناس كبار بس
لأ ده بسبب رئيسي فينا احنا
لأن احنا الموظف والدكتور والمدرس وكل وظيفة بتاثر علينا بشكل مباشر
لو كله طبق الدين مسلم أو مسيحي أو يهودي حتي في شغله صح
واحدة واحدة هنلاقي ان الناس الكبار ناس متدينة تدين سليم
وشادة البلد دي لقدام
وكفاية الأية دي عشان توصل الجزئية دي
إن الله لايغير مابقوم حتي يغيروا مابانفسهم
وأنا ليا راي أخير في حتةالحلال والحرام دي
الحاجات الحرام نوعين
حاجات بتاثر عليا وعلي الناس حواليا
وحاجات بتاثر عليا انا بس
يعني مثلا اما اكون مبصليش او مبصومش
المواطن اللي ماشي في الشارع هيتاثر؟
ولا اما اكون بصلي وبصوم بس مرتشي أو بفتح دماغي أو عندي محسوبية؟
ورغم ده المواطن المصري يحتقرك
وتصغر في نظره أكتر لو شافك معدي قدام الجامع ومدخلتش
وفي الأخر
أكيد فيه ناس كتير كويسة
لكن انا عن نفسي ده جزء كبير من اللي بشوفه
لكن في الاول وفي الاخر يفضل الدين ده حاجة بين الواحد وربنا
ومهما كان محدش يعلم ايه اللي في القلوب غير اللي خالقها
لكن اهو الواحد بيحاول يستشف شوية من اللي بيشوفه
وربنا يهدي
21 comments:
بص يافندم الانسان المصري متدين شكلي بطبعه
وفعلا كلامك صح ديما بيدور على الي بيخدم مصلحنه
من الموظف للسواق لبتاع اللحمه
كله يهمه ايه الي حيصل دلوقتي
وموضع صفحه الوفيات
بيديقني بجد ناس عماله تظهر حبها لشخص خلاص مات
وحبيبي ياوالدي
وكنت شمعه الحياه وو
واكيد طول مهو عايش مسمعش كلمه
المظهريه في كل شئ حتى في الموت
هرجع اقراء تاني
تحياتي
للاسف انت كلامك سليم وانا نفسى باشوف حاجات كتير زى كدة من عينة تيمنوا وحاجات كدة وبس يلمح اى بنت معدية تلاقى عنية وراها زى الكلب بس على فكرة دى بقت ظاهرة متفشية اوى
اخيرا ياريت تنورنى فى بلوجى darebha-sarma.blogspot
تحياتى
السلام عليكم
طبعا يا دكتور
كلامك صح
لانك بتتكلم على نماذج من الواقع
كل واحد واخد له كام متر
من توب الدين
ومفصله على اده
وماشي يقول دا احسن موديل
انتقادك في محله
والمفروض كل واحد يبص جواه
ويشوف هو بيضحك على مين بالظبط
وطالما الموضوع طالب معاه
انه ينادى بالدين ومبادئه
يبقى لازم يكون اد الوضع اللي بيحط نفسه فيه
بس في نقطة اعارضك فيها
انت بتقول ان الحرام نوعين
حرام بيض صاحبه والمجتمع
وحرام بيضر صاحبه بس
اخالفك بقى هنا
الحرام بيضر الكل
زي المثال اللي انت قلته
اللي مش بيصلي
صحيح مفيش ضرر مادي
على حد تاني
لكن
شوف انت لما تبقى راجل محترم
وصحتك تمام
ومظهرك ميه ميه
ومعدي على جامع
وما دخلتش تصلي
او معروف عنك انك مش بتصلي
شوف كام واحد حواليك
هيقولك
ياعم هي يعني الصلاة من عدمها هاتعمل ايه
ما اهو تمام التمام ولا بيصلي ولا غيره
ولا ربنا عمل فيه حاجة
وتخيل مثلا الاطفال
وان الشخص يكون قدوة ليهم
يبقى الحرام ضرر للكل عامة
يبقى المفروض
كلنا نلتزم بدينا
قلبا وقالبا
وعلى فكرة في ناس
كويسة كتير
وما تنساش
ان الشعب المصري
دايما يطبق فكرة ابو العريف
هاتيجي على الدين يعني
ومش هايقصقص فيه على كيفه
سلام يا دكتور
كلامك مظبوط والله
احنا شعب هوائي .. وعايز يبان انه متدين وهو لايفقه اي شئ في الدين
وده واضح من اي حد بيقوللهقال الله بيجري والله
شعب شاغل نفسه
ياترى ادخل الحمام برجلي اليمين ولا الشمال
طيب يا ترى صبغ الشعر حرام ولا من السنة
وهلم جرة
شعب عمال يطلع كل العيوب في اللي قدامه في حين انه مليان بيها
تلاقي بنت من اللي يوسف معاطي بيقول عليهم
البناطيل ف النازل والباديهات في الطالع ولافة شعرها بحتة قماشة
وبتعيب على بنت مش محجبة في حين انها ممكن يكون لبسها اكتر حشمة
شعب باة بيفتي في كل حاجة واي حاجة
ده بول ديه رضاعة
مفيش مانع طالما مع المصلحة
ان الله لا يغير ما بقوم حتى يغيروا ما بانفسهم
الى محبى الفنان الجامد أوى و الأنسان الرائع أوى خالد الصاوى شاركوا مدونة عندليبيات تدعوكم لحضور لحفلها الذى تقيمه بمناسبة مرور عام على مدونة خلود... قيه تورتة ماتخفوش
والله يمكن الناس بتحاول تظبط الحجات البسيطه الي شايفنها
يعني بيجو للهايه ويتصدروا زي ما بنقول
عندنا نقياسيت للحكم علي الامور
فيه واحد علي حسب الاهواء
ودا بنقيم بيه الامور علي حسب مزاجنا
والتاني بنقيم الامور زي ماربنا قال
ودا قليل لما بنطبقه
انا موافقاك علي كل كلام علي فكره
وبجد موضوعك جمل زي مدونتك بالظبط
دي اول زياره بس مش هتكون الاخيره ابدا هوهق يعني ان شاء الله
تحياتي ليك يا دكتور
انا بحمد ربنا بجد اني لقيت مدونة حلوة و افكارها صحيحة و علي فكرة تصميم البلوج حلو موت
تحياتي
bedayatan keda
7adretak ekteshaf
wana ba2ra el post 7asset enne ba2ra ta7lel wake3y lelly bey7sal fe masr
fe3lan el kalam fe el samem
laken ana ze3elt awy lamma la2et 7adretak betantaked el masreyen nafsohom sa7e7 homma we7shen awy bas eh elle 7’alahom keda
eh elle 7’alahom monafken we gobana2
law kont fahem en masr tool 3omraha keda yeb2a 7aram 3alek
we law kont fahem en de azma ye b2a lazem te3raf sababha abl ma tezlem el nas
kol el 7ekaya en homma et3awedo 3ala el zolm we el zol we el darb we el mahana 3alashan ye3esho we ya rethom bey3esho 3eshet bane2admen
fa et3awedo, we lama te7ot el solta fe eeed el sofaha2 elle malhomsh ro2ya wala fekr wala ay 7aga 7’ales
yeb2a matantazersh en el 7ayah teb2a bambe we masr teb2a zay el foll
ya3ny law wa7ed nasha2 fe 3elet mogremen fe e7temal kam fe el meya ennoh yetla3 3alem masalan aw 7ata ensan tabe3y
we elnesba elle hate7sebha hatla2ehom homma el nas el 3azema elle 7arbet el zorof we gahl 3alashan teb2a 7aga
7’olaset el kawl
en masr maba2etsh keda 3alashan e7na we7shen we bas la2 da natiget el 3esha fe 7ozn we ham lemodda tewela awy
we sada2ny lamma a2olak en deh 7’eta metdabarah ba2alha senen
we men hena ana ba7aye as7ab el mo2amrah we monafezeha we ba2olohom lel asaf ento azka bekter awy
we yaret 7adretak te7asebhom homma we seb el sha3b el masken fe 7aloh
asfa gedan 3ala el tatwel we kan kol 2asdy enne awada7 weghet nazary mesh aktar
اولا انا بهنيك من قلبى او من عقلى اسلوبى عجبنى واستشفافك فى محله
انا بقى مش هلت واعجن واعيد كلامك بمعنى تانى واعمل واد بورم
صباحك سكر
بلدك محتاجه حرب نفسيه ووقفه بجد كل واحد مع نفسه الكويس والوحش
الكويس يصلح من غيره مش يكبر دماغه بقى عشان كويس
والوحش يصلح من نفسه
قلتلك مش هلت واعجن معلش اصل بنسى
سلامى على قلبك
وعقلك يا سيدى متزعلش
احلام ضايعه مرت من هنا
ربنا يهدى
تحياتى
هههههههههههههههه
يا فاهم يا واعي يا مدرسة
طب والله كلامك صح مية في المية بجد
ربنا يهدي الجميع ويهدينا
انا شايفه ان كلامك فى كتير من الصح وللاسف كتير بيفسروا الدين فيما يخدم مصالحهم واعتقادتهم الشخصيه
تحياتى على البوست
والله يا بيه مش عارف اقولك ايه
بس للاسف انا مصرى والمصرى هيفضل مصرى مش هنتغير لأن مفيش فايدة ومبقتش فارقة سينا من سونيا
السلام عليكم و رحمة الله و بركاته
طبعا مش هاعارضك في اللي حضرتك قلته لانه كله صح و بيحصل ماعدا نقطه واحده هابقا اتكلم فيها بعدين
بس انت مش شايف ان كلنا بننقض الوضع اللي احنا فيه
كلنا بنتكلم عن الشرف و الامانه
كلنا مش عاجبنا الفساد اللي بيحصل
طيب مين فينا حاوليغير الوضع ده !! مش هانلاقي خالص
احنا اساتذه في جلد الذات لكن بصراحه ماعندناش استعداد للتغيير
زي بتوع اوربا ما بيقولوا علينا نحن ظاهره صوتية
:D
*************
النقطه اللي ما عجبتنيش في الموضوع كله نقطة ان فيه حرام بيضر صاحبه و حرام بيضر المجتمع
بصراحه انا مش فاهم الكلمه دي خالص
اعتقد ان الحرام كله واحد و كله بيضر الفرد و المجتمع
تقبل مروري
موضوع عسل اوي ...بص من كام يوم شفت على Otv
ريبورتاج بيسألوا فيه الناس في الشارع اذا البنا على الراضي الزراعيه في العيد حلال ولا حرام...انا عايزة اقولك ولا حد قال معرفش...الكل قعد يفتي وقولك حلال علشان كذا والتاني يقولك حرام علشان كذا...يعني وعند الانسان المصري الجواب اليقين ...وعلى فكره انا عندي مودوع ان اي حد يسألني عن اي حاجه في الدراسه لازم يكون عندي رد بتفسير منطقي
والحمد لله محدش حس اني قلت له اي حاجه غلت ...لأنهم من الآخر كانوا بيسألوا في حاجات ملهاش رد ...المهم بقى اني بتغاز بقى من المصريين اللي بيحرموا الحلال ...بص انا لسه امبارح عماله اكلم اختي في الموضوع دا..لأن مرارتي كانت هتتفقع :D
نيس توبيك :)
اعوذ بالله يا لك من فاسق
الا تعمل يا اخى ان اللون البنفسجى حرام
اعو بالله
هههه
واحشنى اوى يا بوب
جالك الى هيظبطك فى الشطرنج
اولا ازيك يارب تكون بخير ولو اي مساعدات في موضوع ارقام التليفونات للي هتعمل معاهم حورات انا في الخدمة
وبالنسبه للموضوع
انا شيفه انك بتنقض واقع ومش محتاج تتأسف ولا تبعد تهمه اهانه حد أو حاجة لان دا في السوق بجد
ثانيا فكرة ان الواحد يتبع هواه في الدين واضحة قوي بتلاقي واحد رايح أقصي اليمين وشايف الباقي مقصرين مع ربنا وهو شاطر في الامور البسيطه وبس و توضيح هنا :الأوامر في الدين مش كلها علي درجة واحدة حتي المعاصي درجات في كبائر وفي الاقل وهكذا
وفي ناس بقي تلاقيها بردو في الضياع بس بشكل تاني ربك رب قلوب
لا دا مطلوب ولا دا
التوازن وفقه الأولويات
ولو لخصنا الكلام دا
قلة الوعي الديني
وانعدام التربيه الصحيحة
وقله البحث والمعرفة
مجتمعنا يعز الصدفة وحتي مع ربنا كثيرا ما بنحاولش نتعب نفسنا
اسفه علي التأخير
السلام عليكم
بجد موضوعك رائع جدا جدا جدا ، فعلا انت قلت كل اللى كان نفسي اقولوا من زمان ، بجد انا من ساعه ما جيت مصر وانا بواجه صعوبه في التعامل مع الناس ، كل الناس مصالح ونفاق و كذب فعلا حاجة صعبة ، تسلم يدك على الموضوع ده ، جبت كل اللى في نفسي وياريت الناس تتغير للاحسن ، انا بتعب نفسيا من الناس اللى في الشارع وطريقة التعامل والنم على بعض حتى من الاقاربوالكذب وحاجات اخرى انت ذكرتها في الموضوع ، بس حاجة اخيرةعاوزة اقولها انا لااقصد الاساءة للمصريين نهائي بكلامي او حد يفتكر ان انا عشان عايشة بره بقول ، لا خالص مش ده قصدي نهائي .
وانا سعدت جدا بالتعرف على بلوجك والسلام عليكم
السلام عليكم
بجد موضوعك رائع جدا جدا جدا ، فعلا انت قلت كل اللى كان نفسي اقولوا من زمان " مش من زمان اوي (: " ، بجد انا من ساعه ما جيت مصر وانا بواجه صعوبه في التعامل مع الناس ، كل الناس مصالح ونفاق و كذب فعلا حاجة صعبة ، تسلم يدك على الموضوع ده ، وياريت الناس تتغير للاحسن ، انا بتعب نفسيا من الناس اللى في الشارع وطريقة التعامل والنم على بعض حتى من الاقارب والكذب وحاجات اخرى انت ذكرتها في الموضوع ، بس حاجة اخيرةعاوزة اقولها انا لااقصد الاساءة للمصريين نهائي بكلامي او حد يفتكر ان انا عشان عايشة بره بقول كده ، لا خالص مش ده مش قصدي نهائي
وانا سعدت جدا بالتعرف على بلوجك
عندك حق فعلا يا دكتور .. الاهتمام بالأمور السطحية إلى حد ما وغهمال الأساسيات مودينا فى داهية وجميل منك انك استدركت ان حتى الموضوعات البسيطة دى مهمة برضه فى ديننا بس الأهم الالتفات للى هيأثر على مجتمعنا ورفعته ككل أو على الأقل الاهتمام بيهم الاتنين ..
ربنا يهدى الجميع ..
وسلامى للجميع
بجد بوست جميل جدا من
انسان جميل
فعلا هوا دا واقع عايشينه
وادعوك لزيارة مدونتى
رسالة مواطن زهقان
Post a Comment