مـــــــــــفـــــــاجــــــأة العيد.............عـــــــــــــودة دكتور مستكنيص

ميعرفش ليه حن للمرحلة دي من حياته،
مرحلة المدونات ودكتور مستكنيص ورجوعه البيت بلهفة عشان يشوف التعليقات الجديدة،
في وسط حساباته للشغل والتعليم والجواز والبرستيج والعيله وخلافه ،لقي نفسه بيحن لأعقل مرحلة في حياته
عشان كده نعلن عودة عودة دكتور مستكنيص لجمهوره العريض الأربعتاشر نفر اللي كانوا بيخشوا البلوجاية ،واحد رخم هيقوللي ياعم انت بتكلمنا عن دكتور مستكنيص كإنه قال يعني شريف عبد الفضيل ...مين هو مستكنيص؟

هقوله مسكين اللي ميعرفه يجهله لكن سيبوني أجاوبه

مستكنيص شاب قوقازي بيقضي يومه كطبيب إمتياز وصحفي وبورصجي( واحد من اللي اتعلم عليهم في البورصة)بالإضافة لبعض من العمل التطوعي وممارسة الرياضة (أحسن واحد يلعب طاولة محبوسة) مع شوية كورسات لزوم العلام وده طبعا غير مشاريعه وأحلامه المستقبلية
عاوز يسافر ألمانيا وياخد البورد الأمريكي في الجودة ويهاجر كندا ويتجوز البنت اللي بيحبها ويجيبلها شقة تمليك ويشتغل مع الأمم المتحدة في أطباء بلا حدود واخيرا يجيب حتة كيا سيراتو سودا وكل ده في ست شهور سنة بالكتير (بفنوسي ياكناب)

له خبرات ومحاولات سابقة ككاتب قصصي وكمعلق رياضي وكتاجر عطور وككاتب سيت كوم وستاند أب كوميدي وزي مانتوا شايفين فاضل إنه يشتغل مبيض محارة وكمسري ورئيس جمهورية

وسيم للغاية حاد النظر والشكيمة صاحب جسم رياضي قوي (اللي يعرفوه ياريت ميعلقوش عالنقطة دي) مثل يضرب به في جميع أنحاء العالم(مرات براد بيت كانت بتوصف جوزها لأصحاباها بإنه في جازبية مستكنيص) وده طبعا غير خفة الدم متدين من نوع خاص بيصلي التروايح والتهجد والضحي وبس ،رائع في مهارات الاتصال معاه تلات خطوط نمر جامدة جدي

حكمته في الحياة :اللي امه بتديله أحسن من اللي أمه بتدعيله

رؤيته لنفسه: ماشي في الطب وماشي في الصحافة وشكلي في النهاية هكون بياع كنافة

فتاة أحلامه: البت بتاعة فيلم نوت بوك مستعد يتجوزها ويغسلها المواعين

من الأخر إنتوا قدام أسطورة اسمها دكتور مستكنيص
ودلوقت إحنا مع عودة الأسطورة
عودة دكتور مستكنيص
العودة اللي متقلش عن عودة ولاد السوق
بركات وخيري ومرزوق

استنوا دكتور مستكنيص علي مدونته وعلي الفيس بوك
وقد أعزر من أنزر وأعلي مافي خيلكوا اركبوه
بيس؟
صباحكوا لزيز

حـــواديــت الأطـــفــــال ســنـــة 2040

الشاطر أحمد عز

كان ياما كان فيه واحد اسمه الشاطر احمد عز ....أحمد بدأ حياته من الصفر وفي ظرف كام سنة وصلت ثروته لأربعين مليار ومتسألش منين؟ أيامها كان أحمد عنده شركة حديد عز لكن كان عينه عالأميرة الدخيلة وفعلا فضل وراها وقعد يشتري أسهم منها ويدي رشاوي وينخور في أساس الشركة لحد مالشركة وقعت وقدر الشاطر أحمد بمساعدة العمولات إنه يتجوزها ويشتريها بتراب الفلوس وحول الشركتين لشركة واحدة سماها عز الدخيلة وبقي أحمد هو الوحيد في السوق بتاع الحديد لدرجة إن طن الحديد وصل ل8000 جنيه (علي أيامها كانوا كتير)وقدر احمد يحتكر كل حاجة لها علاقة بالحديد في مصر حتي لما ظهر مشروع التخلص من العربيات الموديلات القديمة دخل الشاطر احمد عز في الموضوع وبقي هو اللي بياخد العربيات دي كان ماشاء الله مش عاتق النملة طموح الشاطر أحمد عز موقفش عن الحديد وامتد للسياسة لحد مابقي عضو في لجنة السياسات وعضو مجلش شعب ماشاء الله ومحدش ينسي للشاطر أحمد يوم مابص بعينه بس بصة لأعضاء المجلس خلتهم يغيروا رأيهم من الرفض لموافقة

الناصر وراك الديك أوكاكا

سنة 2009 تولي الخلافة الأمريكية الرجل وراك الديك أوكاكا واستبشر العالم كله وده بسبب تصريحاته اللي أعلن فيها عن احترامه للحريات والأديان وكان من التصريحات اللي خلقتله شعبية في الرأي العام تصريحه برغبته في الانسحاب من العراق(كان عينه علي سوريا)وعاش العالم في عهده الأمن لحد ماجه غزوه لسوريا وبدأت تظهر مواقفه الشجاعة والبطولية ومنها لما أظهر التسامح الديني بإن دراعه اليمين كان اليهودي مناحم ومحدش ينساله مشهد لما جمع الجيش الأمريكي وقالهم تعالوا هنوا أخيكم مناحم فاليوم هو عيد الغفرانومن مواقفه برضه مع ملك الأعداء بشار قلب الأسد إنه عقب هزيمة الجيش العربي سمح لبشار قلب الأسد قائد الجيش وبقية الملوك العرب بمغادرة البلاد بسلام مش بس كده ده كمان عرض عليهم توصيلهم للمكان اللي يحبوه وهنا قالوا في صوت واحد سويسرا ياملك عشان حساباتنا كلها هناكمش بس كده ده كمان مع الأسري ظهرت مواقفه الرائعة وده بإعلان رفضه للسياسة الهمجية والعنيفة بتعذيب الأسري في أبوغريب خصوصا لما اعترف بخطأ بلاده في واقعة أبوغريب من خلال عرضه لصور تدين بلاده وفعلا طبق الرئيس كلامه بعدم تعذيب الاسري في أبوغريب وإرسالهم إلي جوانتانامو وزيادة الاحتياطات لضمان عدم وجود أي تصوير

علاء الدين والإن خمسة وتسعين

علاء الدين ده كان شاب سيس بيدرس في مودرن أكاديمي(علي أيامها الشباب السيس هيكونوا كتروا وهيبقي الغير عادي إنك متبقاش سيس)وكان عايش حياة صعبة كلها كفاح أيامها كان معاه حتة 6630 كان مستحملها وياما خد تريقة من صحابه اللي معاهم إن سبعين الموضوع كان عاملله لود نفسي صعب لدرجة إنه مكنش بيعرف ينام لأنه كا بيفتكر تريقة صحابه عليه(الواد أبو كاميرا واحدة أهو)وفي يوم لقي شنطة في المترو ضميره قاله يوديها للأمن لكن قالك ياواد اضرب عليها وروح ويادوب بيفتح الشنطة طلعله منها الإن خمسة وتسعين بيقوله شبيك لبيك نوكيا فنلندي مش صيني بين إيديك تطلب إيه؟ليك تلات طلبات قعد علاء يفكر وقاله أول طلب عاوز الفيلم بتاع دينا وحسام أبو الفتوح لأني دخت عليه عالنت مش لاقيه وكما عشان اغيظ الواد كريم إنه الفيلم معاياقاله طلبك عندي رغم إنها مزة تعبانة ومتستاهلش وفعلا جابله الفيلم وعلاء عاش ايام جامدة بيغيظ صحابه بالعدة الجامدة موت وبإنه الوحيد في مودرن أكاديمي اللي معاه الفيلمبعد كام يوم بدا يفكر في الطلب التاني راح مطلع الموبايل وقاله عاوز رقم البت مريم اللي مصاحبة الواد مازن عشان هي بت فرسة وكمان أعلقها منه وأحرق قلبه عليهاقاله أمرك وفعلا خد رقمها وظبطها في ساعتين (من قوانين الشباب السيس المزة متحلاش غير لما تكون بتاعة صاحبك)وعدي كام شهر وعلاء الدين عايش أجمد عيشة بالإن خمسة وتسعين ومقضيها تصوير ونت واير لس والحياة موز لحد يوم روح فيه البيت وهو متضايق أخر حاجة راح مطلع الموبايل وقاله أنا هطلب أخر طلب.....أنا زهقت وعاوز إن 97 زي اللي مع الواد كريم

ش.أ.ر......شـــبــــاب أنـــدونـــيـــســـي .روش

من حوالي سنتين بدأنا نشوف عندنا في الكلية مئات من الطلبة الأندونيسيين والماليزيين اللي جم مصر عشان يستفيدوا من غزير العلم هنا وبالنسبة لي كشاب مصري من نبت الارض الخضرا كنت ببقي فخور بنفسي وببلدي أوي وانا شايف الكم ده من العيون الضيقة وكنت بحب أوي اتابعهم واشوف تصرفاتهم بالظبط زي المواطن الامريكي اللي بيتابع طلبة عرب وافارقة جايين يدرسوا في بلده
المهم كنت بلاقيهم متدينين أوي وحريصين في لبسهم وفي أكلهم معندهوش اختلاط بيمشوا في جماعات صوتهم مبيطلعش باختصار كده تحسهم مركزين أوي في اللي هم جايين عشانه
كزا مرة كنت ببقي عاوز اتكلم معاهم في الاول كان عشان اشوف دماغهم وبعد كده بقي عشان اعمل معاهم علاقات بعد مااقترح عليا صديق اني ممكن اتعلم اندونيسي وادي العيال دي دروس(مشروع مضمون)المهم كبرت دماغي وقلت ياواد ولا تتكلم ولا بتاع
لكن بعد فترة رجعت اتابعهم تاني ولفت نظري اللي شفته عليهم بعد سنة بس من الوجود في مصر
خد عندك مثلا الشاب من دول قاعد مع صحابه علي الارض في الكلية بياكل بورجر من ابو جنيه ونص (بورجر ضفادع) وهاتك ياضحك ابص هناك الاقي شاب وشابة اندونيسيين وهاتك ياتسبيل في ركن لوحدهم وطبعا زمانه بيقولهاالله يباركلي فيك يااغلي من عينيا(بالأندونيسي) قلت ياواد اطلع المكتبة زاكر عشان تتغلب علي الصدمة طلعت لقيت شلة منهم قاعدين وهاتك ياقهقهة ونكت بايخةزي مرة واحد صعيدي ماليزي جه يقعد علي قهوة قعد علي شاي وطبعا صوتهم جايب اخر المكتبة ومحدش عارف يزاكر فرحت نازل تاني ابص قدامي الاقي سيقان قمحاوية قد اينعت وحان.......ولا بلاش عيب ويادوب لسه رايح اقول ياحلو ياابيض انت لقيتها بتدور وشها وبرضه نفس العيون الضيقة والملامح الأندونيسية
وكل ده من سنة واحدة في مصر أنا مش صعبان عليا غير المجتمع الاندونيسي بعد مالشباب دول يرجعوا بلادهم
تسقيط بنطالونات وبيس يامان ومعاكسة في المولات ورنات و0900 وتحرشات ولفلفة بالعربيات في شارع جامعة الدول بتاع أندونسيا
يالا ....هم اللي جابوه لنفسهم
بيس ياشباب

إشــــــــــــــارة مـــــــــرور

صافرة متقطعة بعدها نصبح جنبا إلي جنب، صوتي المتطفل يأتيكي متسائلا عن صديق أدعي أنه يملك هذا الرقم أو ربما أكون وقحا فأتحدث بشكل مباشر عن معاناتي من الفراغ وحاجتي إلي صوت أنثوي يشاركني الحديث لدقائق في أواخرالليل... في كل الأحوال لا تغلقي الخط.. انتظري ربما تروق لكي اللعبة: في الدقائق القادمة لست بحاجة
إلي أحزمة الأمان: فبامكانك الحديث عن وشاية أنهت
علاقة صديقتك بشاب ارتبطتي به عاطفيا فيمابعد وسيكون هناك متسعا لكذباتك وسرقاتك وأيضا عقد الطفولة ,ولن يضير الأمر شيئا إذا تحدثتي عن أفلام إباحية تشاهديها خلسة مع صديقاتك ....لا تقلقي لن أتفحص لوحاتك، ولن يقلقني الشك في كونها مسروقة فكونك مني من القاهرة أوسارة من الإسماعيلية لن يغير في الأمر شيئا ,فأنا لا أطمح في لقاء أو حتي مجرد معاودة الاتصال فأول قواعد اللعبة عدم تكرارها،وهكذا سيستمر كلانا في الحديث بلا قيود وبلا بحدود لدقائق لن يقطعها سوي صافرة أخري متقطعة متبوعة بصوت أنثوي مألوف

يخبرني بنفاذ رصيدي

هـــــــكـــــــذا تـــصـــــنــــــع الـــــدمـــــي

بامكاننا التحول من بشر إلي كائنات

ترفع يديها اليا عند اللقاء

بينما تبتسم الوجوه ابتسامات اقرب إلي زي الاسماعيلي

وتتوحد لغة الشفاه في الإجابة عند السؤال

( الحمد لله ....ربنا يخليك...شكرا)

إلي أن تعاود اليدان الارتفاع اليا مرة أخري

أذنةبالإنصراف

هكذا تصنع الدمي عزيزتي

كــــــلــــــــمـــــــــة

احتياجي لثاني أكسيد الكربون يقل بشدة هذه الأيام

شـــــــــعـــــــــــور

أشعر بقيمة حياتي عندما تظهر صورتك أمامي

بينما صوت أصالة يملأ عقلي

(معاك رجعتلي تاني حياتي ودنيتي)

عندها لا أجد مايمنعني كي أكون ملك هذا العالم

لا لشيء سوي وجودك في حياتي

وأفيق من أحلامي وأشعر كم أن حياتي بسيطة

عندما أتذكر أن بدايتها الحقيقية

معلقة بضغطة من اصبعك

عندما تضغطين

(send)

وأشعر كم أنتي أنانية عندماأفكر أنك وحدك تملكين تلك الضغطةوتبخلين علي بها

لكني أتذكر أنك لا تعرفين فأشعر كم أنا ظالم

أو أحمق

!!!

حــــــــفــــــلــــــــتـــــــنــــــــا

إس إس إس ....واحد اتنين تلاتة

ألو ألو ألو ....جماعة إضافة الثقافية ترحب بكم

بالصلاة عالنبي كده حفلة التوقيع بتاعة كتابنا

شباك الروح

هتكون يوم

خمسة سبعة الساعة سبعة

في كافيه ميراج بشارع الجمهورية في المنصورة

لو كنت في أي مكان صحرا إن كان أو بستان

قاهرة اسكندرية أو اسوان

لازم تيجي والا عيشتك هتبقي بتنجان

مستنيينكوا تنورونا

شـــــــــبـــــــاكــــــــنـــــــا

أحلى سلام
كتاب شباك الروح
دلوقتي في المطبعة
بيضم مختارات من أعمال أعضاء
جماعة إضافة الثقافية
لتقديمها في المجلس الأعلى للثقافة الشهر القادم
للنقد والمناقشة
هيبقى موجود في الأسواق قريبا
وإن شاء الله
في حفلات توقيع للكتاب
بس لسه بنظبط مواعيدها
............................
الكتاب بيضم
في الشعر
يحيى قدري ، محمد صقر ، محمد رضا
أحمد عبدالله سليمان ، محمد أبوالفتوح الدسوقي
محمد عاصي ، أحمد الحديدي
سالم شبانه ، السيد عباس ، جمال حراجي
..................
في القصة
محمد الجابري ، خالد سمره
محمد الحلواني ، أمجد الصبان
علي أحمد علي
ياسر الدالي ، نصر عبد الرحمن ، أحمد مطاوع

ملحوظة رفيعة يااخواننا....إن شاء الله أنا اسمي هيكون في الكتاب ده محمد الحلواني مش محمد أبو الفتوح زي ماجمهوري العريض أوي متعود وده بسبب قهر مورس عليا من أعضاء الجماعة خصوصا يحيي بيه قدري فقلت أجرب الاسم ولو كل مع الناس أكمل بيه

هع هع هع هع

يـــــــازوووول

جاتلي صدمة أما سمعت دكتور شريف في كورس الأطفال

بيقول إن الجنيه السوداني بقي بخمسة جنيه وفضلت

مش مصدق لحد مابعتت بليز كووول مي للرئيس البشير

واتصل بيا وأكدلي الخبر بعد ماسم بدني بكلمتين عن

خصلتي الكميلة بتاعة بليز كووول مي

يازول نفسي مرة تحول خمسة وتكلمني بدل بليز كول مي

وبعد ماقفلت معاه فضلت أفكر وانا مذهول

مش كرها في الأخوة السودانيين لا سمح الله

إنما أنا فاكر إنه من كام سنة قريت إن لعيب سوداني

اتنقل من نادي لنادي بخمسمية مليون جنيه سوداني

أي مايوازي 200 ألف جنيه مصري

يعني من كام السنة كان الطفل السوكنن ياخد مصروف

عشرين ألف جنيه سوداني يجيب بيهم مصاصة

لكن تجاوزت الصدمة وبدأت أفكر في المستقبل وإننا

يجيلنا عقود عمل في السودان لكن ده بدأ يحصل فعلا من

دلوقت أمال يعني كمان عشرين سنة هيحصل إيه؟

مش بعيد نشتغل بوابين وسفرجية عند السودانيين

ومش بس كده ده كمان الأفلام والمسرحيات السودانية

تتريق عليناويطلع كومبارس مصري يضحكوا عليه

أيه طبق المهلبية اللي دخل هناك ده يازول

ماتقلق ياعثمان ده حسن البواب بتاعي

تعالي ياحسن ...انت قصير كده ليه انا محتاج ميكروفون عشان أوصلك الصوت تحت.....كعكعكعكعكعكعكع

(صوت ضحك الجمهور السوداني في المسرحية

منين جبته ده ياإدريس؟ ده عامل زي بياض البيض

انت أمك فرخة ياحسن؟

كعكعكعكعكعكعكعكعكع

مادام الكعكعات زادات يبقي

ده أكيد الزعيم محمد عجب كوميديان العرب الأول

ومش بس كده ده كمان لعيبتنا بتوع الأهلي والزمالك

هيروحوا يحترفوا هناك وإحنا نتقسم لهلالابي ومريخابي

وأكيد لو دخلتوا أوضتي أيأمها هتلاقوني معلق صور

ريتشارد جاستن وهيثم طمبل

انا هلالابي علي فكرة

قول الحق خليك جريءالهلال أحسن فريق

حقهم وليهم حق يعملوا أكتر من كده

ماحنا ماوراناش غير التريقة علي خلق الله

من غير مانشتغل ولا نعمل أي حاجة

السوداني بواب والصومالي بلبوصة في الأخبار

لحد لما الناس سبقونا وحتي في المستقبل برضه لو اتقدموا زيادة هنفضل نتريق ونقول شفتوا اللي كانوا بوابين عندنا وسياسة الله يرحم الشهيرة وبرضه من غير مانشتغل ولا نعمل حاجة

حتي بيننا وبين بعض الواد بتاع المزاكرة أومليت

وأهطل لحد مايبقي حاجة كبيرة نمشي نلحسله الشوز

وكل ده وإحنا لسه زي ماحنا لا بنحس ولا بنتغير وكل

اللي بنعمله إننا بنختار حد جديد نتريق عليه

الشعب الجيبوتي مثلا في المستقبل

والكميل أوي إني بنقد التريقة دي وأنا في أول البوست

شبه متريق علي الرئيس البشير هههههههههه

إزدواجية إزدواجية من بتاعة بلادها مصري مصري يعني

كل الكلام ده دار في دماغي ودكتور شريف شغال شرح في

الانيميا لحد مالقيته بيسأل

أعراض الأنيميا إيه ياأبو الفتوح؟

هيثم طمبل يادكتور

ســــــــمـــــســــــوم

تقول أسطورة الصحراءأن بدويا كان يريد الانتقال إلي

واحة أخري

فبدأ في تحميل جمله

وضع البسط والأواني وصرر الثياب

وكان الجمل مطيعا يقبل كل مايحمّله

إياه

وبينما هو علي وشك الرحيل

تذكرالبدوي ريشة طائر زرقاء جميلة

كان أبوه قد أعطاها له

فجاء بها ووضعها علي ظهر الجمل

لكن الجمل تهادي من فوره

ومات

ولابد أن يكون البدوي قد وقف يتساءل

كيف لا يقوي الجمل علي حمل ريشة

!!!

إننا نفكر أحيانا في الاخرين بالطريقة نفسها عندما لا

نفهم أن مزحة صغيرة

يمكن أن تجعل كأس المعاناةيفيض

!!!!

(باولو كويلهو)

تــــــــهـــــريــج فــي الـنــــــرويــــــج

لما تقعد مع أب مثلا وتلاقيه بيسب ويلعن في ابنه

وفي اخلاقه فتقعد مع ابنه تلاقيه بيقول معلقات شعر

في تسلط ابوه وأفقه الضيق

أكيد هيجيلك حالة مهلبية في الدماغ وهتسال

طب مين علي حق؟ومين الغلطان؟

ونفس الشيء لو جربت تتكلم مع شيخ عن أحوال الشباب

أو تتكلم مع شاب عن رأيه في رجال الدين

طب لو تخيلنا إن كل واحد غير في طريقة كلامه واتكلم

زي مالطرف اللي قدامه عاوز

يعني الشاب من دول وهو خارج

يروح رازع أبوه بقين فصحي جامدين بالعقل

أبي إني ذاهب لأقضي بعض الوقت مع الأصدقاء علي المقهي

سنجلس قليلا ثم نتجول، بعدها سأعود للمنزل لأكمل

ماتبقي لي من استذكار

اكيد النتيجة هتبقي احسن من لو الشاب من دول قال

بابا احنا هنخرج نقعد عالقهوة ونتسكع شوية بعدها

ارجع اشوف الهم اللي ورايا

وشيخ الجامع اللي بيتكلم كلام مجعلص وأي هبل مالهوش

دعوة باللي احنا فيه ومش بياثر في حد

تخيل لو حب يجذب طبقة الشباب

بصوا كده يارجالة بالصلاة علي النبي منك ليه هيا مش

قصة هما خمس فروض هتصليهم في الجامع وتخرج وأنت هادي

وصافي اخر حاجة نحط عليهم شوية صيام وقراية قران

ونبقي كده كلنا مية فل ،علي خمسة دعا باخلاص يبقي

كلنا كده في الجنة لو ربنا تقبل عملنا ودعاءنا

بيس ياشباب؟

ده حتي راجل الشارع اللي طول النهار

بيطالب بحقوقه بهدوء وبزوق من غير مايلاقي استجابة

ويوم مايتعصب يقولك همج وشغب وطريقة

ضربني بوشه في

تخيل لو كان ده كلامه

حضرتك احنا بنطالب بعدم رفع الدعم عن العيش حفاظا

علي جاهزيتنا للشغل والاجتهاد عشان نطلع افضل

انتاج من اجل رفعة الوطن ودفع عجلة التنمية ورفع

معدلات النمو وبرضه حفاظا علي صورتنا امام العالم

طبعا الكلام اللي فات ده كله تهريج في النرويج

انما الفكرة هل لو انا عاوز أوصل حاجة معينة لفئة

معينة مختلفة عني....هل اتكلم باللغة اللي تلائمهم

ويفهموما واللي في وسطها احشر الزتونة اللي عاوز

اوصلهالهم ؟

ولا ده يعتبر مسخ لهويتي وفقدان لشخصيتي والمفروض اتكلم

بطريقتي واللي عاجبه عاجبه واللي يفهم يفهم واللي

ميفهمش يروح يضرب شاورما لحم حمير؟

يمكن انا ميال شوية لفكرة اني اكلم كل حد باللغة

اللي يفهمها حتي ولو كنت مختلف معاه مادامت اهم

حاجة عندي ان رسالتي توصل

يعني الهبل اللي انا كتبته في الاول ده لو تخيلناه

بيحصل فعلا في كل موقف من دول هتلاقوا ان النتايج

افضل للطرف اللي بيتكلم

الخوف بقي ان كله يغير في نفس الوقت وتيجي تكلم ابوك

بالفصحي وبالاحترام تلاقيه بيقولك

انا مفنيخ أوي

ومعنديش طاسة للهرتلة بتاعتك

!!!!!

تاج مختلف

قليل أما بشوف تاج له فكرةمعينة كله بيبقي من نوعية مقاس شرابك ايه ؟ وبتستعمل سيجنال تو ولا كرست؟ واسئلة ظريفة جدا كافية انها تصيب القاريء بشلل رباعي
لكن امبارح شفت علي مدونة فوكيرة تاج لزيز أوي حبيت إني أجاوبه خصوصا اني كان في بالي حاجة قريبة من الفكرة بتاعته
التاج ببساطة انك تقول ايه هيا الحاجات اللي بتمثل ليك أكسير تفاؤل ...بس كده زي شكة الدبوس

إشطة؟؟

نتكل علي الله

أما اصحي بدري واكون نايم كويس وأخد دش وافطر وأصلي واشوف شوية من العيال كبرت وانزل الكلية ...اكسير تفاؤل

أما بكون متضايق أو في مشكلةونفس الشيء اما يكون فيه حاجة حلوة في حياتي والاقي موبيلي بيرن من حد مهتم للي انا فيه حلو أو وحش...اكسير تفاؤل

أما بيتنشرلي حاجة في إحنا وأكون تعبت فيها واحس ان الحاجة دي صحافة صح زي موضوع الهجرة الغير شرعية ....اكسير تفاؤل

أما بسمع في الاتوبيس وانا رايح الجامعةأغنيةبحبهاوحاسسها( بعيدا طبعا عن أغاني مصطفي كامل وجورج وسوف اللي واكلة دماغ السواقين)....أكسير تفاؤل

أما بسهر أزاكر طول الليل واصلي الفجر واقابل صحابي ونضرب فول وطعمية ونفضل نتمشي لحد مالنهار يطلع واشتري الجورنال واروح....أكسير تفاؤل

أما بتفرج علي ماتش كورة للأرسنال أو اقري حاجة لعلي سلامة أو اشوف فيلم أم العروسة بتاع عماد حمدي
أو فيلم(the guardian)
أكسير تفاؤل

أما حد بيقصدني في حاجة واعملهاله مهما كانت بسيطة ولو حتي مجرد إني أعين علي واحدة سبت خضار أو أعدي حد الشارع...أكسير تفاؤل

أما بصلي العشا في الجامع في الصيف ويكون الشيخ صوته حلو وأحس بطعم السجود علي السجاد الاخضر وهوا المرواح يلمس خدودي في اضاءة بسيطة جدا في الجامع....أكسير تفاؤل

أما بتعرف علي حد جديد والاقيه حد نضيف أوي ودماغه ماشية مع دماغي ....أكسير تفاؤل

أمايدخلنا دكتور يشرحلنا ويربط الشرح بتاعه بكلام عملي ويكون جايب حالات وأحس إني دكتور بجد ...أكسير تفاؤل

أما بفتكر اللي كنا بنعمله في صناع الحياة واتفرج علي الصور والفيديوهات أو أاقابل حد يفكرني بشغلنا أيامها....أكسير تفاؤل

أما يجيلي تليفون من حد معرفوش ويقوللي:

محمد أبو الفتوح؟ ...انا كنت عايزك في كزا كزا كزا أيا كان الكزا ده....أكسير تفاؤل


أما اكون عضو في تيم وأحس ان التيم ده له هدف وكل واحد حاطه قدامه ونفسه يوصله حتي ولو كان التيم ده في الكورة .....أكسير تفاؤل جامد أوي

أما بيجيلي كومنت موضوعي أصدقه من جوايا أو اما الاقي مدونتي متضافة عند حد معلقش عندي قبل كده أو اما الاقي حد مستشهد في بوست عنده ببوست ليا او بكلام ليا......أكسير تفاؤل لا تتخيلوه

وأما أحس إني مفيش حد زعلان مني وإني معملتش حاجة غلط في حق حد خصوصا لو حد قريب مني .....أكسير تفاؤل

وإن حد يقري التاج ده وياخده عنده ويجاوب عليه في مدونته....أكسير تفاؤل

بـــــــــحــــــبك يـــاحــــمـــــار

جدي وجد عيالي الزعيم مصطفي كامل قال جملته الخالدة

لو لم اكن مصريا لوددت أن اكون مصريا
وفي سنة 2008 ظهرت الجروب الشهيرة علي الفيس بوك بتاعة

لو لم أكن مصريا يبقي قشطة أوي
لكن لا جدو مصطفي ولا البنوتة بتاعة اسكندرية كملوا

وقالوا طب ولو كنت مصري
وهنا جه دوري عشان اغير مجري التاريخ واكمل الجملة دي
لو كنت مصريا لوددت أن أكون حمار

حمار؟؟

أيوة حمار
لو بقيت حمار في مصر هيبقي لي لازمة وفايدة في المجتمع هبقي بتركب عشان أوصل فلاح للغيط بتاعه يشوف رزقه وأكل عيشة ويدفع عجلة التقدم والتنمية وهشيل إشولة (جمع شوال) لمكنة الطحين عشان اساعد ان الدقيق والرز يوصلوا لبيت راجل غلبان ياكل وياكل عياله فيطلعوا أشداء أصحاء يساهموا في علو شان الوطن
والنقطة دي غايبة في حالة لو بقيت بني ادم لأني هتركب هتركب بس من غير فايدة
هتركب في الجامعة من كل دكتور مش عاوز يشرح بضمير وفي الموقف من أي سواق عاوز يحمل اربعات وفي السوق من أي بياع بيغلي علياو لو حصل وعبده بنتاكور بلغ عني وقدم شيكاتي اللي من غير رصيد يبقي هتركب كمان في القسم وبعد عمر طويل في البيت من الولية اللي هتبقي مراتي اللي هشتغل ويطلع عيني عشانها ومعجبهاش في الأخر فركوبة بركوبة تبقي ركوبة الحمار أفيد
مش بس هيبقي لي فايدة وانا عايش ده كمان بعد ماموت لان جثتي هتتدبح وتتاخد اللحمة اللي فيها وتتباع والغلابة ياكلوا سندوتشات شاورمة وكبدة والسندوتش بجنيه يعني هساعد اني اطعم الناس المحاريم واحسسهم انهم بني ادمين فيرضوا بحياتهم وتعم عليهم السكينة وميتهبلوش من الفقر اللي عايشين فيه ويثوروا علي الحكومة ويعطلوا عجلة التنمية في البلد
اما لو كنت بني ادم فبعد موتي عذاب للي يعرفني ايشي مصاريف دفن وميتم وولادي يقطعوا في بعض عشان الميراث او يلعنوا اللي جابوني لما يلاقوا اني سايبهم عالحديدة والناس اللي عليا ليهم فلوس لما يروحوا لاهلي ويقولولهم مالكوش فلوس عندنا
وغير اني افيد الناس فانا نفسي لو بقيت حمار هعيش مرتاح هاديء النفس مستقر من دون أي عقد نفسية حمار سوي فعلا لاني هيبقي كل تحركاتي مع الراجل الفلاح اللي شاريني يااما في القرية بتاعته يااما بالكتير مثلا في الكفر اللي جنبنا يوم السوق ودي كلها مناطق فيها ناس عايشة في نفس مستوايا يعني لا هعاني من طبقية ولا شعور بالنقص تجاه الطبقات العليا لأني مش هحتك بيهم أصلا

يعني عمركوا شفتوا حمار ماشي في المهندسين ولا في مدينة نصر؟

كبيره ميت أبوعلي وتبقي في نظره بيفرلي هيلز

إنما لو بقيت بني ادم فبعد كام شهر من وعيي عالحياة هكون عضعضت كل ضوافر ايدي ورجلي كمان من الاحساس بالنقص والاكتئاب تجاه الطبقات العالية اللي هتحاوطني في كل حتة في التلفزيون و في الشارع و في الجامعة وطبعا هتتولد جوايا عقد نفسية قد كدهو بداية من الشيزوفرينيا لحد عقدة سيكوبيسو بيسو

(عقدة نفسية معروفة تتلخص فيها احلام الشخص في الزواج من انثي هدهد عقيمة بعين واحدة وشعر اصفر كستنائي وبتلبس بادي كارينا)
وكمان لو كنت حمار هبقي عايش في حالي الناس كلها بتحبني وكل كبارات البلد بيحبوني وبيضربوا بيا المثل(اتجدعن ياكمبورة واطلع زيه عشان نحبك) انما وانا بني ادم هلاقي التهم والشتايم نازلة ترف عليا ايشي مثير شغب وايشي مش متحضر وغوغائي وبلطجي وإرهابي لا والاصعب من الشتايم نفسها هو إنها بتطلع من كبارات البلد الناس اللي المفروض أعيش أتمني رضاهم وكل ده عشان ايه ؟

عشان شوية كلام محشور في الزور ولا عشان كام انفعال الواحد يفك بيهم عن نفسه ؟

لاياعم الواحد لو بقي حمار يبقي قشطة أوي وفل في النعل
لكن سيبكوا انتوا أجدع ميزة من إني أبقي حمار هيا إني هنضم للفئة اللي مطرب الدولة قيثارة الأغنية الشعبية روح الفن الملهمة سعد الصغير غني لها

بحبك ياحمار
وهو يعني عمركوا شفتوا حد بيغني بحبك يامستكنيس؟

ده كان سمسوم صغير عن فوايد إنك تبقي حمار في مصر استنوا عليا بس

وبعد كام بوست في الموضوع ده هاخدكوا ونطلع رحلة نشتري كل واحد بردعة

بس تبقي مصيبة لو الموضوع انتشر ونروح نلاقي البردعة غلت

بـــــــــــوســـــــــت مــــــــش لا قــــــــــيــــــــلــه عــــــــنــــــــوان

من أكتر من ست شهور اما كتبت البوست اللي فات

كنت في حالة مخلياني مش قادر اعمل

أي حاجة ولا مخلياني عارف اكتب

كنت حاسس إني متكسر من جوايا ومعدتش أنفع لأي حاجة

إحساس عامل زي إحساس لعيب الكورة اللي قطعوا رجله

ودلوقت أنا بمر بنفس الحالة لكن حاسس إني أقدر اعمل أي حاجة وكل حاجة

حاسس بثقة لا توصف في امكانياتي وعمال أكسر في حواجز كنت حاططها قدامي

جايز لأن سبب الحالة دي دلوقت مختلف تماما عن سببها من ست شهور

وجايز لأني شفت في الست شهور دي حاجات غيرتني من جوة وكبرتني سنين كتير

في الست شهور دول نجحت في حاجات مكنتش اتخيل اني افكر فيها

وفشلت في حاجات قمة في التفاهة واتعرضت لمواقف ماكنتش اتخيلها

وشفت ناس بشكل مختلف تماما سواء حلو أو وحش

باختصار في الست شهور دول اتفرمت في حياتي من غير ماكون قاصد ده

بس طلعت من المفرمة سليم وأقوي من الأول وبقي عندي مناعة من الفرم

الكلام ده انا نزلت من بيتي مخصوص الساعة تلاتة الفجر عشان اكتبه

وبكتبه ومشغل أغنية مسألة مبدأ بتاعة علي الحجار

الأغنية اللي في يوم من الأيام خلتني أعيط بشكل غير عادي

نفس الأغنية دي بقت بتديني قوة رهيبة من جوايا

باختصار

أنا مبقيتش أنا

هرجع اكتب تاني هنا لأني محتاج ده أوي

إيـجــبــشــن حـلال وحـرام

الإنسان المصري بحكمه متدين ماشاء الله مولود علي السجادة

عشان كده تلاقي موضوع الحلال والحرام بيفرق معاه جدا

لكن بما إنه الانسان المصري بجبروته وقوته

والسبع تلاف سنة (من يوم ماتولدت وهما سبع الااف مازادوش يعني) شقاوة وتفتيح دماغ

عمل لنفسه حلاله وحرامه الخاصين بيه

حاجة كده ميد إن ايجبت خلي الناس تيجي تشوف الصناعة المصرية بخير

أو نقدر نقول إنه عمل

edit

شوية في المجال ده

الحلال بقي عنده له مجالاته اللي عمل فيها حبة تظابيط

زي النميمة

يفضل يتكلم ويجيب في سيرة ده ودي

وفي الاخر يقولك احنا مالنا احنا عندنا ولايا دع الخلق للخالق

وتقريبا الصفحة اللي فيها الأية بتاعة

اتامرون الناس بالبر وتنسون انفسكم

مقطوعة عنده من المصحف

لأن اشطر حاجة ممكن المصري يعملها

انه يفضل ينقد وينقد والحاجة دي راكباه من ساسه وراسه

يعني يتكلم عن الكوسة والرشوة اللي ماليين البلد

ولو رحتله الشغل هتلاقي ابن خالته وابنه وبنت أخوه متعينين عنده

أما النفاق فهو يعزه أوي

ورايه فيه إنه يجوز كما قال البحبحاني

فتلاقيه نازل مدح في رئيسه

ايا كان بقي رئيسه في العمل

ولا رئيسه في البلد

وهاتك ياكلام واشعار عن مزاياه والنجاح اللي تم بفضل وجهة نظره

وتخطيطات جلالة سعادة فخامة عظمته

ويمكن ده منتشر في فئة كبيرة جدا جدا من الشعب بتوصل للإعلام وفي الصحف

(راجع الصحف أخبار أهرام جمهورية)

ومن الحاجات الحلال اوي وبنعرف نطبقها أوي

حتة ازكروا محاسن موتاكم

يااااااه تقولش الحديث ده نزل عشان المصري

تلاقي الواحد من دول يموت من هنا وايه؟

معلقات عن الخير اللي كان بيعمله

وعن طيبة قلبه

وعن كفاءته ومحاربته للفساد

وناقص يكلموك عن فتحه للاندلس

في حين تلاقي لو عندك زاكرة شوية

وتفتكر كلامهم عنه قبل الموت

أو تعاملهم معاه

تلاقي انه كان زي طفلة الحشرة

وتلاقي تاني يوم موته في الجرايد صفحتين قصاد بعض

وكل واحد بقي قايلك بق من نوعية

فقدنا الاستاذ والاب

رمز يصعب تعويضه

يوم اسود علي السينما المصرية

الأهلي يواجه انبي...... إحم لا لا اسف انا يظهر عديت علي صفحة الرياضة

مش بس كده ده مثلا بعد مايموت بسنة وجاية الزكري السنوية

تلاقي ولا الضباب طب فين ياجماعة الحب الحب؟

فين الكلام اللي محسسنا انكم خلاص مش هتتنفسوا هوا بعديه؟

تلاقي كله راح

ويمكن لو جيت سألتهم عنه؟

مش بعيد حد يقولك

مين؟ مش الطويل الرفيع ده؟

ياعم ده كان سلام سلام يعني

وعندنا مثال صالح سليم

سنة وسنتين بعد مامات الدنيا كانت ضلام لإدارة الأهلي و لكل الاهلاوية

انما بعد خمس سنين مثلا

عدت الزكري السنوية بتاعته اول شهر مايو ده من غير مانحس بيها

غير في كام موقع لجماهير الاهلي

وطبعا مش المطلوب اننا نفضل نعيط علي الميت لمية سنة

بس هي فكرة الازدواجية والتضاد الواضح أوي في تعاملنا مع الميت

ومن ضمن الأحاديث اللي بينساها المصري

(الساكت عن الحق شيطان أخرس)

لو اتطلبت شهادته لصالح حد غلبان قصاد حد كبير او حاجة زي ده

تلاقيه عامل عبيط

وولا معبر ويقولك ياعم أربي عيالي

وممكن يطلع صايع ويجيبلك دليل ديني يدعم وجهة نظره

ولا تلقوا بايديكم الا التهلكة

وحاجة زي دي تفتحلنا سكة تانية من سكك حلال المصري

يؤمن بالابداع والتفكير في الدين

وعنده الثقة انه هيطلع تفسير جديد للقران غير اللي سبقوه

عشان كده بنلاقي ناس تستشهد بايات واحاديث علي مزاجهم وبالظاهر

حاجة كده زي ولا تقربوا الصلاة

مش عارف مين اللي يقولك ان المفروض ان ميراث البنت يبقي زي الولد

عشان الست بقت بتشتغل

والقصة مبقتش زي زمان

تقولش الدين ده كان مثلا موديل قديم ونزل منه نسخة جديدة فنعمله أبديت

ومن ضمن الحاجات الحلال

المصري في تعامله مع الناس

تشوف تعامله مع حد غلبان أو منكسر ايشي اشتغالات علي تريقة

وطبعا ده مبيبقاش حرام

لانه بيتاخد انه روشنة أو شطارة أو خبرة وحنكة في الحياة

بدون بقي مايعرف إنه ممكن بمواقف زي دي يربي عقد عن الشخص ده أو يحقر منه

أو يقلل ثقته بنفسه

أما بقي الحرام

فتلاقي مثلا من أكتر الحاجات اللي يستحرمها

لو مردتش السلام

أو لو مقلتش بسم الله قبل ماتاكل

ويزعل أوي لو اكلت او شربت بايدك الشمال

ولا بقي لو موبيلك رن وانت بتصلي

وموقف مثلا زي لما تكون بتتكلم في الموبيل في الاتوبيس مع واحدة

تلاقي البصات هتحرقك والغمزات واللمزات تقولش بيشوف حفرية فرعونية

ولو سمعت أغاني

ومش أي أغاني

لو أغاني شبابية وعاطفية يبقي حرام

أما لو لأم كلثوم أو حليم أو فيروز او منير أو وجيه عزيز

فيبقي لا

انت واد دماغ ومثقف

والمفتي قال يجوز

وحليم حلال ياحازم

والله الفكرة ماهي تريقة أو سخرية من اللي متمسك بدينه

بالعكس والله

انما الفكرة في الناس اللي بيمسكوا في الحاجات البسيطة جدا

ويسيبوا أهم حاجات

مش معني كده إني بقول أو بسخر من إننا نسمي قبل ماناكل وناكل بايدنا اليمين وكده

لا طبعا

لان دي حاجات في ديننا

وواجب نعملها بس اكيد طبعا منكتفيش بعملها ونسيب أهم حاجات في ديننا

الحاجات اللي فعلا ممكن تخلينا نتقدم ونقف علي رجلينا

لأن عمر ماكان الإسلام دين منغلق ولا دين متاخر

الإسلام لو طبقناه صح هنسود العالم زي ماأجدادنا سادوه بالإسلام برضه

بس أكيد ماهوش بالإسلام بتاع خطيب ابو دقن ومقصر الجلابية

ومبياديش شغله صح ومقضيها واسطة ونفاق

نموزج زي ده كتير أوي

وللاسف مصر دولة تبدو متدينة أو محافظة

ورغم ده بنتاخر يوم عن يوم

وأكيد تاخرنا ده مش بسبب مسئولين أو ناس كبار بس

لأ ده بسبب رئيسي فينا احنا

لأن احنا الموظف والدكتور والمدرس وكل وظيفة بتاثر علينا بشكل مباشر

لو كله طبق الدين مسلم أو مسيحي أو يهودي حتي في شغله صح

واحدة واحدة هنلاقي ان الناس الكبار ناس متدينة تدين سليم

وشادة البلد دي لقدام

وكفاية الأية دي عشان توصل الجزئية دي

إن الله لايغير مابقوم حتي يغيروا مابانفسهم

وأنا ليا راي أخير في حتةالحلال والحرام دي

الحاجات الحرام نوعين

حاجات بتاثر عليا وعلي الناس حواليا

وحاجات بتاثر عليا انا بس

يعني مثلا اما اكون مبصليش او مبصومش

المواطن اللي ماشي في الشارع هيتاثر؟

ولا اما اكون بصلي وبصوم بس مرتشي أو بفتح دماغي أو عندي محسوبية؟

ورغم ده المواطن المصري يحتقرك

وتصغر في نظره أكتر لو شافك معدي قدام الجامع ومدخلتش

وفي الأخر

أكيد فيه ناس كتير كويسة

لكن انا عن نفسي ده جزء كبير من اللي بشوفه

لكن في الاول وفي الاخر يفضل الدين ده حاجة بين الواحد وربنا

ومهما كان محدش يعلم ايه اللي في القلوب غير اللي خالقها

لكن اهو الواحد بيحاول يستشف شوية من اللي بيشوفه

وربنا يهدي