Sunday, April 27, 2008

تــــــــهـــــريــج فــي الـنــــــرويــــــج

لما تقعد مع أب مثلا وتلاقيه بيسب ويلعن في ابنه



وفي اخلاقه فتقعد مع ابنه تلاقيه بيقول معلقات شعر


في تسلط ابوه وأفقه الضيق



أكيد هيجيلك حالة مهلبية في الدماغ وهتسال



طب مين علي حق؟ومين الغلطان؟



ونفس الشيء لو جربت تتكلم مع شيخ عن أحوال الشباب



أو تتكلم مع شاب عن رأيه في رجال الدين



طب لو تخيلنا إن كل واحد غير في طريقة كلامه واتكلم



زي مالطرف اللي قدامه عاوز



يعني الشاب من دول وهو خارج
يروح رازع أبوه بقين فصحي جامدين بالعقل


أبي إني ذاهب لأقضي بعض الوقت مع الأصدقاء علي المقهي



سنجلس قليلا ثم نتجول، بعدها سأعود للمنزل لأكمل



ماتبقي لي من استذكار


اكيد النتيجة هتبقي احسن من لو الشاب من دول قال



بابا احنا هنخرج نقعد عالقهوة ونتسكع شوية بعدها



ارجع اشوف الهم اللي ورايا



وشيخ الجامع اللي بيتكلم كلام مجعلص وأي هبل مالهوش



دعوة باللي احنا فيه ومش بياثر في حد



تخيل لو حب يجذب طبقة الشباب



بصوا كده يارجالة بالصلاة علي النبي منك ليه هيا مش



قصة هما خمس فروض هتصليهم في الجامع وتخرج وأنت هادي



وصافي اخر حاجة نحط عليهم شوية صيام وقراية قران



ونبقي كده كلنا مية فل ،علي خمسة دعا باخلاص يبقي



كلنا كده في الجنة لو ربنا تقبل عملنا ودعاءنا



بيس ياشباب؟



ده حتي راجل الشارع اللي طول النهار



بيطالب بحقوقه بهدوء وبزوق من غير مايلاقي استجابة



ويوم مايتعصب يقولك همج وشغب وطريقة



ضربني بوشه في
تخيل لو كان ده كلامه



حضرتك احنا بنطالب بعدم رفع الدعم عن العيش حفاظا



علي جاهزيتنا للشغل والاجتهاد عشان نطلع افضل



انتاج من اجل رفعة الوطن ودفع عجلة التنمية ورفع



معدلات النمو وبرضه حفاظا علي صورتنا امام العالم



طبعا الكلام اللي فات ده كله تهريج في النرويج



انما الفكرة هل لو انا عاوز أوصل حاجة معينة لفئة



معينة مختلفة عني....هل اتكلم باللغة اللي تلائمهم



ويفهموما واللي في وسطها احشر الزتونة اللي عاوز



اوصلهالهم ؟


ولا ده يعتبر مسخ لهويتي وفقدان لشخصيتي والمفروض اتكلم



بطريقتي واللي عاجبه عاجبه واللي يفهم يفهم واللي



ميفهمش يروح يضرب شاورما لحم حمير؟



يمكن انا ميال شوية لفكرة اني اكلم كل حد باللغة



اللي يفهمها حتي ولو كنت مختلف معاه مادامت اهم



حاجة عندي ان رسالتي توصل



يعني الهبل اللي انا كتبته في الاول ده لو تخيلناه



بيحصل فعلا في كل موقف من دول هتلاقوا ان النتايج



افضل للطرف اللي بيتكلم



الخوف بقي ان كله يغير في نفس الوقت وتيجي تكلم ابوك



بالفصحي وبالاحترام تلاقيه بيقولك



انا مفنيخ أوي
ومعنديش طاسة للهرتلة بتاعتك

!!!!!

4 comments:

محض روح said...

تعرف يامحمد الي تاعب نفسيتني في ده كله ان حلوان بقت محافظه
:(
ياعني انا دلوقتي بقيت خريجت محافظه حلوان
مممممممممم
مساء الخير

سارة درويش said...

انا مفنيخ أوي
ومعنديش طاسة للهرتلة بتاعتك

هههههههههههههه

والله دا اللى كنت خايفة منه من اول ما قريت البوست فى الاول
بص فى رايي خير الامور الوسط ، يعنى اتكلم كلام مقبول لكن ماتنزلش من طبقتك ، ومافيش مانع لو ترتقى .. ع فكرة كنت كاتبة بوست بنفس الهدف اسمه (( جربت تصلح القربة قبل ما تنفخ فيه ؟)) اتمنى تشرفنى وتقراه

بجد بوست جامد يا دوك

دكتور مستكنيص said...

محض روح....

مساء الخير يامرزوق واضح اوي تأثير الحشيش بتاع اسكندرية طب قوليلي بس بتجيبي من انهو تاجر
مش عاجبك جامعة حلوان الله يرحم اما كان نفسك تتخرجي ولو من جامعة صفط اللبن هههههههههههههه
طب انا راضي اتخرج لو حتي من جامعة منيا القمح
صباح الزغللة يادينا
وخدي السمسوم ده هدية علي الكومنت

دكتور مستكنيص said...

سارورة....

منوراني ياسارورة باللسعان بتاعك
انا فاهم اللي تقصديه بس في طرق كلام متنفعش تبقي وسط يااحمد ياسيد
اشطة؟
ابقي خلينا نشوفك
والنبي تقعدي تاخدي شاي
خلاص يالا مش مشكلة عشان متتاخريش لان الشاي هياخد وقت
تحياتي اوي وسلامي المربع